भांगरभूंय | प्रतिनिधी
मुंबयचो गोंया कडेन लागींचो संबंद. शेंकड्यांनी गोंयकार, मूळ गोंयकारांच्यो पिळग्यो थंय वाडल्यात. पुणेंय आमकां लागींचें. कारण आयटी उद्देग, शिक्षणाक लागून बंगळुरू प्रमाण पुण्यांय जायते गोंयकार रावतात. पुणें ही महाराष्ट्राची सांस्कृतीक राजधानी. स्वातंत्र्य चळवळीक बळगें दिवपाचें, ती सक्रिय करपाचें काम ह्या शारान केलां. महात्मा ज्योतिबा फुले, लोकमान्य टिळक, गोपाळ कृष्ण गोखले, प्र. के. अत्रे, पु. ल. देशपांडे, पं. भीमसेन जोशी, स्मिता पाटील, धनराज पिल्ले, नरेंद्र दाभोळकर, बी. के. एस. अय्यंगार, राहूल बजाज…. कितलीं नांवां घेवपाचीं. शेंकड्यांनी प्रतिश्ठितांनी पुणें घडयलां. शिवाजी महाराजांच्या काळा सावन पुण्याचें नांव इतिहासांत अज्रंवर आसा. पुणेंकारां वयले विनोद, विक्षिप्त पाटयो… होय चर्चेचो विशय थारला. साहित्य, राजकारण, समाजकारण, खेळ, सिनेमा, नाटक, उद्देग, गायन… खंयचेंय मळ घेयात, पुण्याक टाळून कोणाक मुखार वचपाक मेळचेंच ना. ‘पुणे तेथे काय उणे’ म्हणटात तें ओगीच न्हय. मात, बदलत्या काळा वांगडा सुसंस्कृत, विचारी, अभिरुचीपूर्ण अशीं बिरुदां मिरोवपी ह्या शारांत खरेंच सगलें आसा, कांयच उणें ना, अशें सगल्यांकूच दिसपाक लागलां. कारण जालां, वाडिल्ली गुंडगिरी, हिंसाचार. एका काळार मुंबय खांप्यां गुन्यांवकारांचें आश्रयस्थान आशिल्लें. थंय अंडरवर्ल्ड डाॅन रावताले, सुपारी घेवन भर दिसा खून करताले. पुलिसांचींय एन्कावंटरां जातालीं. आतां पुण्यान मुंबयक सायड मारल्या!!
पयर थंय एका तरणाट्याचो खून जालो. ताचे पयलीं एका मोग्यान मोगिकेचेर कोयतो घेवन हल्लो केलो. दोग तरणाटे मदीं पडूंक नाशिल्ले जाल्यार ती जाग्यारुच सोंपपाची. ताचे पयलीं कोयतो गँगाच्या ‘पराक्रमा’ चे 3- 4 व्हिडिओ व्हायरल जाल्यात. कोयतो गँग म्हणल्यार कोयत्या सारके सुरे घेवन दुकानांनी घुसून खंडणी घेवप, जिवेशी मारप, गाडयो फोडप वा दादागिरी करप, लोकांक लुटप… कोणे शापोतां सांगलींच जाल्यार ताचेर कोयतो मारप. फाटल्या 10 म्हयन्यांत पुण्यांत असले कांय प्रकार जाल्यात. हे गुंड भायले न्हय, तर चडशे महाराष्ट्रांतलेच! रातच्या वेळार जेवपाक, सिनेमाक, पबांत वचप ही नवी संस्कृती पुण्यांय सुरू जाल्या, तातूंत ही कोयतो गँग! पुलिसांची कडक नदर आसा, तरीय अदीं मदीं हे गुंड तकली वयर काडटातूच.
43 लाख लोकवस्तीचें हें शार. हांगा केन्ना असलो हिंसाचार जावंक नाशिल्लो. पूण, आतां हे खंडणीचे, चोरयेचे प्रकार नेटान चलतात. तें पळोवन कांय जाण महाराष्ट्राचो बिहार जावपाच्या मार्गाचेर आसा, अशी टिका सरकाराचेर करतात… आनी हो एकूण प्रकार पळयल्यार हे टिकेंत मातूय तथ्य ना, अशें म्हणपाचें धाडस कोणाकूच जावचें ना. बायलांक सांजवेळा भायर भोंवप कठीण जालां. मारामारी सगलेच कडेन जाता, पूण कोयते घेवन गँगवाॅर जावप ही हुस्क्याची गजाल. हे प्रकार सिनेमांनी सोबतात. उत्तरे कडल्या कांय राज्यांनीय ते जाल्यात. पूण, हें एकूणच शांत कालेतीच्या पुण्याचे भलायकेक सोब सारकें न्हय! पयर रातीं तर ‘गदर- 2’ पळोवन भायर सरपी गुंड तरणाट्याचो आदले दुस्मानकायेंतल्यान गुंडांचे दुसरे टोळयेन लोकां सामकार ‘मर्डर’ केलो. पुराय शारांतली सुरक्षा इबाडपी ही घडणूक. थळाव्या पुलिसांच्या खांदार व्हडली जापसालदारकी आयल्या.
ह्या तरणाट्यांचीं आडनांवां पळयल्यार ते महाराष्ट्रांतलेच हें कळटा. पुलिसांक ह्या टोळयां विशीं म्हायती आसतलीच. तांणी आतां वावराक लागचें पडटलें. हल्लो, गँगवाॅर जालें म्हणटकूच कितें तें करुया, ही वृत्ती उपकारची ना. वेळारूच ह्या विंचवांची नांगी चेंचची पडटली. कारण लोकांक भेश्टावन वा हल्लो करून झटपट गिरेस्त जावंक मेळटा हाची गोडी हेर तरणाट्यांक लागूं येता. ही वृत्ती वाडची ना, हे खातीर पुलीस यंत्रणेक आनी गृह खात्याक पेंगट बांदून वावराक लागचेंच पडटलें. जें कितें घडलां, तें पुण्यां. आमकां कित्याक पडलां ताचें, अशें कोणाक दिसता जाल्यार तीं पिशेंपणां. कारण पुणें गोंयां पसून चड पयस ना. हांगाच्या दर्यावेळांचेर खंडणीचे प्रकार जाल्यात. एके टोळये कडल्यान राखण मेळची म्हूण दुसरे टोळयेक राखणेचो रोंट दिवपूय घडये चलता आसतलें. पुलिसांनी तपास करपाक जाय. पुण्याचो हो प्रकार हे वटेन पावचो न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
