भांगरभूंय | प्रतिनिधी
प्रत्येकान कितेंय करचें पयलीं शांत चित्तान विचार करपाक जाय. कारण…
कांड वा काण्ड ह्या उतराचो अर्थ ग्रंथाचें प्रकरण. रामायणांत सात भाग आसात, तातूंत बालकांड, सुंदरकांड अशीं प्रकरणां वाचूंक मेळटात. विशिश्ट काळाचें वा विशयाचें तें वर्णन. वनस्पतीच्या खोडाकूय कांड म्हणटात. मात ह्या उतराचो हालींच्या काळांत रुढ जाल्लो अर्थ म्हणल्यार वायट गजाल, भानगड, बदनामी करपी घडणूक बी. कांय दिसां पयलीं नासकांतल्या सिन्नर तालुक्यांत एक व्हडलें कांड भायर सरलां. ताणें फक्त महाराष्ट्र राज्यूच न्हय, तर पुराय देश हादरला. मिरगांव आश्रमाचो बाबा अशोक खरात हाचें हें प्रकरण. बायलांचो, चलयांचो लैंगीक छळ केल्ल्याचो ताचेर आरोप आसा. ते विशींचे व्हिडियो पुलिसांक मेळ्ळ्यात. हो हायटेक बाबा खंय अंकशास्त्रज्ञ, ज्योतिशी. मात हाचो गैरफायदो घेवन ताणें नाका जाल्लें केलें. नशीब बदलतां, समस्या पयस करतां, अशें सांगपी ह्या बाबाच्या नादाक आघाडेचे फुडारी, उद्देजक लागिल्ले. एकेक करून तांचेय व्हिडियो भायर सरपाक लागल्यात.
खरातबाबान पांच नरबळी दिल्यात आसुये, असो दुबाव काल सरकारी वकिलान न्यायालयांत केलो. बाबाच्या पेनड्रायव्हांत 100 व्हिडियो सांपडल्यात, अशी म्हायतीय पुलिसांनी दिली. ह्या बाबाचो एक वांगडी जाधव हाका लागून हें प्रकरण भायर सरलें. सीसीटीव्ही वयले व्हिडियो मोबायलाचेर घेवन तो खुद्द बाबाक ब्लॅकमेल करपाक लागलो. पूण खांपो बाबा पांच कोटींची खंडणी दिवपाक तयार जालो ना. मागीर जाधवान ते व्हिडियो खुद्द त्या बायलांक धाडपाक सुरवात केली. एके बायलेच्या घरच्यांनी पुलिसांक तो व्हिडियो दाखयलो आनी बाबाचें भविश्य काळखी जालें. आतां जाधव आनी ताचे वांगडी फरारी आसात. महिला आयोगाची अध्यक्ष चाकणकर ही बाबाची भक्त. ती ताची पाद्यपुजा करताली. तिका राजिनामो दिवचो पडलो. खरातबाबान राजकी फुडाऱ्यांचे मजतीन अब्जांनी रुपयांची मालमत्ता जमयिल्ल्याचें भायर सरलां. खरें म्हणल्यार तांच्या ह्या व्हीआयपी भक्तांचीं नांवां जाहीर जावंक जाय. खूब कठीण आनी लागीं लागीं अशक्य अशी ही गजाल! तरीय पुलीस आपले परीन तपास करतात. महाराष्ट्र पुरोगामी म्हूण प्रसिद्ध. थंयच्या संतांनी, फुडाऱ्यांनी धोंगीपणाचेर, अंधश्रद्धांचेर खर टिका केल्या. आतां थंय अंधश्रद्धा निर्मूलन कायदो आसा. मात तरीय जर खरातबाबा सारके लोक लोकप्रीय जातात. तांकां अनुयायी मेळटात जाल्यार संतांनी केल्लें कार्य फुकट गेलें म्हणपाचें.
अंधश्रद्धा म्हणल्यार अज्ञानाची सांवळी. देवाचेर श्रद्धा दवरची, पूण मनशांचेर अंधविस्वास दवरचो न्हय. चमत्कारा परस विज्ञानाचेर विस्वास दवरात. जंय प्रस्न विचारिनात वा विचारपाक मनाय आसता, थंय फटवणूक जावपाची शक्यताय आसता.
खरातबाबाचेर लैंगीक शोशण, फटवणूक, अर्थीक गैरवेव्हाराचे आरोप आसात. आतां तर नरबळीचो दुबाव खुद्द सरकारान उक्तायला. आपले दैवी शक्तीन हो बाबा खंय भूतबाधा, करण्यांचेर उपचार करतालो. आनी हें करतना तो वयलीं नाका जाल्लीं कामांय करतालो. राजकी फुडाऱ्यांक हाता कडेन धरून ताणें बरेच कारनामे केल्यात. मालमत्ता जमयल्या. तीर्थ म्हूण तो भक्तांक उत्तेजक द्रव्यां, आपलें मूत मिस्तुरात करून दितालो, असो पुलिशेक दुबाव आसा. असल्या साधू, बाबांक सुशिक्षीत लोकूय फटवतात. संकश्टांत ते आदार सोदतात. थोड्यांक सुवार्थ सादोवपाचो आसता. थोड्यांक बाबा कितें करीत ताची भिरांत दिसता. उत्तर भारतांतले दोन भोंदू तर सगल्यांक खबर आसात. ते केन्ना बंदखणींत आसतात आनी केन्ना पॅराॅलाचेर सुट्टात तेंच कळना. समाज कितलोय सुदारलो तरीय अंधश्रद्धा, तांचे विशीं भिरांत अजून आसा. बाबांक शरण वचपीय भक्त वाडत आसात. प्रत्येकान कितेंय करचें पयलीं शांत चित्तान विचार करपाक जाय. कारण भायर वळखूंक येनात अशे बरेच कोले बसल्यात. ह्या खरातकांडाचो बेगीन सोक्षमोक्ष लागून दोशींक खर ख्यास्त जातली?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
