भांगरभूंय | प्रतिनिधी
गोंयांतूच दोन बँको बुडल्यो तातूंत कांय लोकांनी आपली प्रोव्हिडंड फंडा सारकी जिविताची जोड दवरिल्ली. कशे जगतले काय ते लोक? सरकारान तांचे कडल्यान टॅक्स घेतलो म्हणटकूच तांची तरतूद करूंक नाका आसली?
आतां रोखडेंच बजेट येवपाचें जालें. म्हजे सारक्या आम आदमीक ह्या बजेटाचो जरी कांयच उपयोग जालो ना तरी बजेटांत कितें आसतलें काय? आनी हांतल्यान आमच्या बोल्साक कितली कातर लागतली काय हें जाणून घेवपाची एक उमळशीक आसताच. बजेट म्हणलें म्हणजे पयली याद जाता ती आदले अर्थ मंत्री जे मुखार प्रधानमंत्री जाले त्या डॉ. मनमोहन सिंगांची. तांची मौनिबाबा म्हणून कोणेय कितलींय जरी फकांडां मारलीं तरी भारतीय अर्थवेवस्थेक एक वेगळी दिशा दाखोवपी आनी नवी उर्जा दिवपी ते पयले अर्थ मंत्री म्हणचे पडटले. तांणी आमचे वेवस्थेंत जितले म्हणून बदल केले आनी आमची अर्थवेवस्था घटमूट केली ताचेंच फळ तर आयज आमकां मेळटा. डॉ. मनमोहन सिंग आनी तांचे उपरांत पी. चिदंबरम हांणी बजेट मांडटना सदांच मध्यम वर्गियांचो विचार केलो. तांच्या बोल्सांत चड दुडू कशे वतले आनी तांकां थाकाय कशी मेळटली हाचो विचार केलो.
आयज सामको सादारण मनीस शेर मार्केटांत पयशे घालता. पयलीं फक्त बँकांनी फिक्स्ड डेपोजीट करप इतलेंच लोकांक कळटालें. पूण आयज तेच पयशे शेर मार्केटांत वतात आनी पयशे वाडटात. ह्या सादारण मनशाक शेर मार्केटाची गोडी हांच्याच काळांत लागली. ह्या अर्थ मंत्र्यांनी शेर्सांचेर मेळपी डिव्हिडंड आनी लाँग टर्म कॅपिटल गेना वेलो आयकर शुन्य करून लोकांक शेर मार्केटा कडेन व्हेले. हांतल्यान शेर मार्केटाकूय बरे दीस आयले. दर एकल्यान आपल्या रिटायर्ड जिवितांत सुखान रावचें, कोणा कडेन हात पसरपाची तांचेर पाळी येवची न्हय म्हणून प्रोव्हिडंड फंड, विमो अश्या फंडांनी पयशे घालता त्या पयश्यां वेलो कर माफ केलो. वर्साक देड लाख मेरेन बचत जावंक लागली जाका लागून फुडार सुगूर जावचो. हें सगलें तांणीं मोनेपणान केलें.
आयज कितें जाता तर बडबड चड जाता आनी लोकांचो विचार उणो. आपल्या मनांतलें वाऱ्यार घालप्यांक लोकांच्या मनांतलें आयकुचेंशें दिसना. डॉ. मनमोहन जरी मौनिबाबा आसले तरी लोकांच्यो भावना तांकां कळटाल्यो. आनी तांच्या मनांतलें वळखून ते प्रत्यक्ष कृती करताले. आयज तशें घडना. आज फकत बढायोच चड प्रत्यक्षांत कांयच ना. जेन्ना लाँगटर्म केपिटला वेलो कर काडलो तेन्ना सरकारी तिजोरेचेर ताण येवचो न्हय म्हणून एक वेगळो टॅक्स लायलो. एस टी टी – सेक्युरिटी ट्रांसेक्शन टॅक्स. कोणेय वर्सा उपरांत शेर्स बी विकले म्हणजे एस टी टी फारीक करपाचो आनी मेकळें जावपाचें. हाकाच लागून लोक चड तेंपा खातीर सेक्युरिटी दवरूंक लागले आनी शेर मार्केट वयर चडूंक लागलें.
आयज ह्यो सगल्यो सवलती काडून उडयल्यात. सरकाराक मेळटा तितली येणावळ उणीच दिसता. डिव्हिडंडाचेर टॅक्स लागता. लाँगटर्म केपिटल गेनाचेर टॅक्स लागता पूण एस टी टी मात काडून उडोवंक ना. तो आसाच. म्हणजेच सरकार दोट्टी टॅक्स वसूल करता. उपाय नासून लोकांक तो भरचोच पडटा. विमो म्हणटा तो जाणटेपणांतली तशेंच अकस्मात जावपी दुर्घटणे खातीर केल्ली तजवीज. घरांतल्या जोडकाराक कितेंय जाल्यार ताचेर अवलंबून फामिलीक जगपाक त्रास जावचे न्हय म्हणून केल्ली तरतूद. सद्याचें सरकार त्याच पयश्यांचेर कर घेता. तोय दोट्टी. सुरवेक विमो काडटना जिएसटी आनी पयशे परत घेतना आयकर. जगपाचेरूय कर आनी मरपाचेरूय कर. सामान्य मनशाक जगप नाका करून उडयलां म्हणल्यार जाता.
आमचें सरकार लोकांच्या लाभाचेर कर घेता पूण कोणाकूय लुकसाण जाल्यार सरकाराक ताचें पडिल्लें आसना. वाल्यान जेन्ना आपणाल्या घरच्यांक आपल्या पातकांत वांटेकार जातले काय म्हूण विचारलें तेन्ना तांणी खंय जाप दिली, आमी फक्त तुज्या जोडींत वांटेकार जावपाचीं. तुजीं पातकां तुवें भोगपाचीं. सरकारूय हेंच करता, तें फक्त आमच्या फायद्याचेर कर घेता पूण आमकां लुकसाण जाल्यार सरकाराक लागना.
आतां कशें तें पळेयात. आमी जोडटात आनी भविश्याचो विचार करून बँकेंत ठेव दवरतात. बँक कोणाक तरी ते पयशे वापरूंक दिता आनी आमच्या दुडवांचेर आमकां ज्यूर मेळटा. सरकार ह्या ज्युराचेर टॅक्स घेता. मदींच कोणतरी बँक बुडयता आनी आमचे पयशे बुडटात. तेन्ना त्या पयश्यांची जापसालदारकी सरकारन घेवंक नाका आसली? तुमी जेन्ना आमच्या ज्युराचेर टेक्स घेतात तेन्ना जावपी लुकसाण भरून दिवप तुमची जापसालकी आसूंक जाय न्ही? तुमी आमच्या लावांत वांटेकार जाल्यात तशेच लुकसाणेंतूय वांटेकार जायात न्ही. पूण ना. सरकार तशें करिना. बँक बुडोवपाक जे कोण जापसालदार आसतात तांचेर कितें कारवाय जाता? ना. रिझर्व बँक सोमतीच बँकेचेर बंधनां घालता आनी कांय तेंपान बँक बंद उडयता. बुडटात कोण तर अकावंट धारक. आतां तरी पांच लाखांची भरपाय मेळटा. पयलीं फक्त एक लाख मेळटाले. आनी ताच्याकूय चड आशिल्ल्या पयश्यांचें कितें? गोंयांतूच दोन बँको बुडल्यो तातूंत कांय लोकांनी आपली प्रोव्हिडंड फंडा सारकी जिविताची जोड दवरिल्ली. कशे जगतले काय ते लोक? सरकारान तांचे कडल्यान टॅक्स घेतलो म्हणटकूच तांची तरतूद करूंक नाका आसली?
आतां तर सरकार बँकांचें विलिनीकरण करूंक सोदता. आतां मेरेन चार बँकांनी तरी जोड दवरूंक मेळटाली. एकादी बँक बुडली तर हेर बँकांचेर पातयेवन रावंक जातालें. आतां चार बँकांतले दुडू एके कडेन येतले आनी बँक बुडली तर? लोकांनी कितें जीव दिवपाचो? सरकारान हाचेर विचार करूंक जाय. बँकांनी जितली ठेव आसा त्या सगल्याचेर विमो काडूंक जाय. बँक बुडलीच जाल्यार लोकांचे सगले दुडू परते मेळपाचें प्रयोजन जावंक जाय. लोकांच्या मनांतलें इल्लें आयकत काय हें सरकार?
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
