खतरनाक खलनायक : रणजीत

भांगरभूंय | प्रतिनिधी

कलाकार

भारतीय सिनेमांत खलनायकांच्या भुमिकेक खाशेली सुवात आसा. ह्या भुमिकांनी प्रेक्षकां मदीं भंय, तिरस्कार निर्माण करपी जायते कलाकार आशिल्ले. तांणी जायतीं भिरांकूळ खलनायकांचीं पात्रां रंगयिल्ली. लोक तांकां वास्तवांत पळयल्यार लेगीत पयस रावताले. तातूंतलें एक म्हत्वाचें नांव म्हणल्यार रणजीत. 1970 आनी 80 च्या दशकांत ताच्यो भुमिका गाजिल्ल्यो. गब्बरसिंहाचे भुमिके खातीर रणजीताचें नांव विचारांत घेतिल्लें हाचे वयल्यान ताच्या अभिनयाचो अदमास काडूं येता.
अमृतसर लागसारच्या जंडियाला गुरू ह्या गांवांत 12 सप्टेंबर 1942 दिसा रणजीताचो जल्म जालो. तागेलें पुराय नांव गोपाल बेदी. ताचो आजो वेपारी. स्वातंत्र्याच्या काळांत वाडत वचपी दंगलींच्या त्रासांक लागुन रणजीताचो बापूय कुटुंबाक घेवन दिल्लीक आयलो. रणजीताचें भुरगेपण, शिक्षण दिल्लींत जालें. ताका फुटबॉलाची आवड आशिल्ली. तो गोलकीपर आशिल्ल्यान ताचे इश्ट मोगान ताका ‘गोली’ म्हूण उलो मारताले. तो कॉलेजींत शिकतालो तेन्ना एक दीस दिसाळ्यांत वायुसेनेचो निकाल छापून आयिल्लो. कोणे तरी ताका सांगलें, ही सामकी कठीण परिक्षा. खूब थोडे भुरगे पास जातात. रणजीत आनी ताच्या तीन इश्टांनी वायुसेनेचे लेखी प्रवेश परिक्षे खातीर अर्ज भरलो. तिगूय पास जाले. उपरांत तांकां निवडी खातीर जबलपूराक आपयले, थंय ताचो एक इश्ट वैजकी चांचणेंत अपेशी थारलो. पूण रणजीता सयत ताचे हेर दोन इश्टांक वायुसेनेन पायलट प्रशिक्षणाक वेंचून काडले. पुताची निवड वायुसेनेंत जाल्या हें ताच्या कुटुंबाक तो मेरेन खबर नाशिल्लें. वायुसेनेचे बॉण्ड बापाय कडेन पावलें तेन्ना तांकां कळ्ळें आनी परिवार खूब खोशी जालो.
रणजीत उर्फ ​​गोपाळ बेदीक प्रशिक्षण घेवपा खातीर कोयंबतुराक धाडलो. थंय रणजीत प्रशिक्षकाचे चलयेच्या मोगांत पडलो. प्रशिक्षणाचेर उणें आनी चलये कडेन चड लक्ष तो दिवपाक लागलो. प्रशिक्षकाक ही गजाल कळटकच तो तिडकलो. रणजितानूय तिडकीन ताका जाणवायो सांगल्यो. परिणाम शिस्तभंगाची कारवाय. फकत पांच म्हयन्यांच्या प्रशिक्षणा उपरांत ताका घरा धाडलो. घडये नशिब ताका फिल्म इंडस्ट्रींत व्हरपाचें आशिल्लें. 500 परस चड चित्रपटांनी काम केल्ल्या रणजीताक केन्नाच सिनेमा पळोवपाची आवड नाशिल्ली. कॉलेजीच्या काळांत लेगीत सिनेमा पळोवपा परस फुटबॉल खेळप ताका चड आवडटालें. पूण एक फावट इश्ट ताका ‘गायड’ सिनेमा पळोवपाक घेवन गेले. हो ताणें पळयिल्लो पयलो चित्रपट. उपरांत देव आनंदाचोच ‘हम दोनो’ पळोवपाक व्हेलो. देव आनंदालो अभिनय रणजीताक खूब आवडलो. ताच्या व्यक्तिमत्वाचो ताचेर प्रभाव पडलो. पूण तो मेरेन सिनेमांत काम करचें असो पयसुल्ल्यान लेगीत विचार नाशिल्लो.
एक दीस तो एका इश्टाच्या घरा गेल्लो. थंय ताचे कांय सोयरे आशिल्ले. ताच्या व्यक्तिमत्वान प्रभावित जाल्ल्या एका सोयऱ्यान ताका विचारलें, फिल्मांनी काम करपाक इत्सा आसा? ताका ही ऑफर दिवपी मनशाचे नांव आशिल्लें रणवीर सिंह. तो राजस्थानांतल्या कोटा हांगाचो, पूण ब्रिटनांत रावतालो. थंयच्या चित्रपट उद्देगांत तो सक्रीय आशिल्लो. ताणें ताका दिल्लींत आपयलो आनी ट्रक ड्रायव्हराच्या जिविताचेर आदारिल्ल्या चित्रपटाची पटकथा वाचून दाखयली. रणजीतान फकांडांनी ही ऑफर स्विकारली. बऱ्याच दिसानी ताका रणवीराचें पत्र आयलें, तातूंत बरयिल्लें ‘फिल्म इंडस्ट्रींतले लोक नवो नायक घेवचे परस प्रस्थापीत अभिनेत्या वांगडा फिल्म करपाक सल्लो म्हाका दितात. तरीय सिनेमांत काम करपाची इत्सा आसल्यार मुंबय येयात.’ त्या वेळार रणजीत बेकार आशिल्लो. मुंबय भोंवपाक वता अशें निमित्त सांगून चेतन आनंदाच्या घरा रावपी रणवीराक मेळपाक रणजीत मुंबय पावलो.
रणवीरा वांगडा रणजीत चेतन आनंदाच्या घरा यो- वच करतालो तेन्ना सुनील दत्त आनी रणजीत हांचें मेळप जालें. सुनील दत्ताचेर पयलेच भेटी सावन रणजीताचो खूब प्रभाव पडलो. रणजीताली सुनील दत्ता कडेन घट इश्टागत जाल्ली. रणवीराले सिनेमाचें शुटींग लेगीत सुरू जावंक नाशिल्लें. अर्थीक पुरवण करपी मनशान न्हयकार दिलो. रणजीत दिल्ली वचपाक सोदतालो, पूण रणवीरान ताका कांय काळ रावपाक सांगलें.
रावतलो खंय हो प्रस्न आयलो. रेल्वेची तिकेट बुक करून परत दिल्लीक वतलों असो विचार आशिल्लो, चित्रपट मळा वयल्या लोकांक मेळप रणजीतान बंद केल्लें. तो परत घरा वचपाची तयारी करतालो. ह्या काळांत सुनील दत्त ‘रेशमा और शेरा’च्या शुटींगाची तयारी करतालो. एक दीस रणजीत हाॅटेलांत जेवतना ताचे वळखीचो एक भुरगो ताका मेळपाक आयलो. ताणें ‘सुनील दत्त तुजो इश्ट, ताचे कडेन उलोवन रेशमा और शेरा फिल्मांत भुमिका दी’, अशी विनवणी केली. रणजीत त्या भुरग्याक घेवन सुनील दत्ताल्या ऑफिसांत गेलो. मॅनेजरांन ताका तुका सुनील दत्त सिनेमांत वहीदा रेहमानाच्या भावाची भुमिका दिवपाक सोदता अशें सांगलें. आपल्या वळखीच्या भुरग्याची शिफारस ताणें मॅनेजरा लागीं केली. सुनील दत्ताले दिग्दर्शकानय रणजीक सांगलें की निर्मातो-दिग्दर्शक मोहन सहगल हाणेंय ताका एक दीस फोन केल्लो ‘रणजीत मेळ्ळो जाल्यार मेळपाक यो’ असो रकाद दिवंक सांगलां.
मोहन सहगलाची आनी रणजीताची पयलींच वळख आशिल्ली. तो सिनेमांत काम दिवपाक सोदता, अशें ताका समजलें. दुसरे वटेन रणजीताक नोकरे खातीर जर्मनीक धाडपाची वेवस्था बापायन केल्ली. फिल्मांत करिअर करचो काय जर्मनींत वचचो हें रणजीत घुस्पा गोंदळांत पडिल्लो. निमाणे रणजीतान थारायलें की कोणाच्या हाता खाला काम करपाक वच्चें परस फिल्मांत करीयर करप बरें. फिल्मांनी तिगलो ना जाल्यार दिल्लीक वचून बापायक वेवसायांत मजत करतलों.
रणजीत मोहन सहगलाक मेळ्ळो आनी ताणें ‘सावन भादो’ चित्रपटांत रणजीताक दामू ह्या पात्राची भुमिका दिली. सुनील दत्तान ‘रेशमा और शेरा’ त काम दिलें. तागेलें नांव बदलून ‘रणजीत’ केलें. पयल्या दोनूय चित्रपटांनी रणजीतान सकारात्मक भुमिका केल्यात. फुडें ‘शर्मिली’ ह्या चित्रपटांत तो खलनायकाचे भुमिकेंत दिसलो. हातूंत तो राखीचे कपडे पिंजपाचो यत्न करताना दिसता. ताचो प्रीमियर दिल्लींत जालो तेन्ना ताचें पुराय कुटुंब हो सिनेमा पळोवपाक आयिल्लें. ताणें केल्ले हे लज्जास्पद कृतीक लागून आतां तांकां कोणाक तोंड दाखोवपाक मेळना, अशें ताचे आवयन सांगलें. मागीर कुटुंबाचो गैरसमज निवळावपाक रणजीत अभिनेत्री राखीक घरा घेवन आयलो. राखीन रणजीताच्या आवय- बापायक समजायलें की हें फकत फिल्माचें शुटींग आनी प्रत्यक्षांत रणजीत तिचे कडेन केन्नाच वायट वागलो ना. तेन्ना कुटुंबाचो गैरसमज पयस जालो.
शर्मिली उपरांत ताची फिल्मी अभिनय कारकीर्द फुलपाक लागली. फुडें ताणें 200 परस चड हिंदी आनी कांय पंजाबी सिनेमांत तशेंच टीव्हीचेरूय केल्या भुमीकांची खूब तोखणाय जाली. णव्वदाच्या सुमाराक रणजीतान कारनामा आनी गजब तमाशा ह्या दोन चित्रपटांचें दिग्दर्शन केलें. पूण ते सिनेमा पडले. उपरांत रणजीतान दिग्दर्शन सोडलें. रणजीतचें लग्न नाझनीन नांवाचे चलये कडेन जालां. तांकां दोन भुरगीं आसात. धूव दिव्यांका आनी पूत चिरंजीव. ताची धूव दिव्यांका फॅशन डिझायनर आनी पूत चिरंजीव मोटार स्पोर्ट्सांत करियर करता. रणजीतान मुलाखतींत सांगिल्लें की ताची धूव दिव्यांका नोयडा फॅशन डिझायनिंग कोर्स करताली. तेन्ना तो चलयेक मेळपाक वतकूच जेवपाक रेस्टॉरंटांत वतालो. रणजीता वांगडा तरणाटे चलयेक पळोवन लोकांचो गैरसमज जातात हें रणजीताक कळ्ळें तेन्ना गैरसमज निवळावपाक तो वेटराक मोठ्यान सांगतालो की ‘म्हजे धुवेन जेवणाची ऑर्डर दिल्या ती बेगीन हाडून दी.’
83 वर्सांचो आसून लेगीत रणजीत सोशल मिडियाचेर सक्रीय आसा. ताणें आपल्या शेतकामाच्या अणभवांचेर पोस्ट केल्या उपरांत धर्मेंद्रानय आपले शेतकी अणभव सांगपाक सुरवात केली. ताच्या पोस्टांनी विनोदी वृत्ती आनी आत्मनिरीक्षण दिसून येता. फिल्मांनी खलनायक रंगयतालो तरी वास्तव जिणेंत रणजीत हो शुद्ध शाकाहारी. सोऱ्या पसूनय तो पयस रावलो. आतां तो पुरायपणान निवृत्त जाला. पूण, रणजीताचे चाहते बाॅलिवूडांत अजूनय आसात

सुदिन वि. कुर्डीकार