भांगरभूंय | प्रतिनिधी
अडवलपाल ग्रामसभेंत थाराव मंजूर; गांवचें पुराय हीत सांबाळून वेवसाय सुरू जावप गरजेचें
दिवचल: अडवलपाल ग्रामसभेंत काल खण वेवसायाक चडशा लोकांनी तेंको दिलो. तो सुरू जावन गांवची सर्वांगी उदरगत जावप गरजेचें आसा. खण कंपनिनूय पर्यावरण आनी सगले तरेचें गांवचें हीत सांबाळपा कडेन लक्ष दिवप गरजेचें आसा असो सूर लोकांनी ग्रामसभेंत उक्तायलो.
अडवलपाल ग्रामसभेंत आयतारा खण विशयाचेर चर्चा जावन चडशा लोकांनी खणीचें समर्थन करतना खणीक परवानगी ना दिवपाचो थाराव पंचायतीन फाटीं घेवन खण वेवसायाक तेंको दिवचो अशी आग्रही मागणी केली. ते प्रमाण तो आदलो थाराव फाटीं घेतलो.
पंचायत कचेरेंत जाल्ले ग्रामसभेंत ट्रक धनी, खणीचेर अवलंबून आशिल्ल्या विवीध ग्रामस्थांनी खणीक तेंको दितना ह्या वेवसायाक लागून वेगळ्योवेगळ्यो येवजण्यो गांवांत येवन गांवची उदरगत चालीक लागतली असो सूर उक्तायलो. खण समर्थक लोकांनी ग्रामसभेंत खणीक परवानगी दाखलो दिवपाक पूर्ण समर्थन दाखयलें आनी तसो थाराव ग्रामसभेंत मंजूर केलो.
हो वेवसाय सुरू दवरतना गांवचें पुराय हीत सांबाळप बंधनकारक आसा. ताका लागून पर्यावरणाक लुकसाण जावचें ना. तशेंच हेर बाबतींत कंपनी वेवस्थापनान सगले तरेची खबरदारी घेवन सर्वसमावेशक अशा प्रकारचो वेवसाय करतना तांणी पूर्ण जतनाय घेवची आनी लोकांचे सगले बाबतींत हीत सांबाळचें. थळाव्यांक रोजगार दिवचो. थळाव्यांक वेगळेवेगळे कंत्राट उपलब्ध करून दिवचे. तांचे ट्रक येरादारी खातीर घेवचे आनी गांवचे उदरगतीचे नदरेन विशेश लक्ष दिवचें अशे तरेचो सूर चडशा जाणांनी ग्रामसभेंत उक्तायलो.
अंकिता खरवत, मयूर कळंगूटकार, निलेश परब हांचे सयत खूबशा जाणांनी आपली भुमिका मांडटना खण वेवसायाचें समर्थन केलें. चडशा जाणांनी खण वेवसायाक समर्थन दिल्ल्याचें बसकेंत स्पश्ट जालें. कंपनीन गांवचे सगले तरेची हीत सांबाळप हाचेर तांणी आपली भुमिका मांडली. वेवसाय चालू जावप काळाची गरज आसा. सर्वसमावेशक उदरगती खातीर खण कंपनीन योगदान दिवचें अशी मागणी ह्या वेळार समर्थकांनी केली.
पंचायत कचेरेंत आयोजीत केल्ले ग्रामसभेक वेगळ्यावेगळ्या विशयांचेर चर्चा जातना खणीक तेंको दिवपाचो निश्चेव व्यक्त केलो. हे ग्रामसभेंत सगले पंचायत वांगडी, ग्रामस्थ हाजीर आशिल्ले.
ग्रामसभेंत फोमेंतो खण कंपनीक तेंको
हे ग्रामसभेंत खण आमच्या गांवांतल्या लोकांच्या बऱ्या खातीर आसा. ते खातीर फोमेंतो खण कंपनीचे उपकारी आसात. आयज हे खण कंपनीक लागून गांवांतल्या बेरोजगार तरणाट्यांक काम मेळटा. शाळे खातीर बस सेवा उपलब्ध जायत आसा. गांवांतल्या रोजगारा बरोबर गांवांतले अर्थीक प्रस्न सुटावे जायत आसात. ते खातीर खण वेवसायाक विरोध करिनासतना ताका तेंको दिवया. तेच बरोबर खण कंपनी कडल्यान कसलोच त्रास जाणवूंक दिवचो न्हय अशें सांगून गांवांतल्या लोकांनी फोमेंतो खण वेवसायाक येवकार दिलो. कंपनीन गांवा खातीर केल्ल्या कार्या खातीर उपकार मानून ग्रामसभेंत खण वेवसायाक तेंको दिवपाचें थळाव्या लोकांनी निश्चीत केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
