भांगरभूंय | प्रतिनिधी
फुडल्या पांच म्हयन्यांत खण उद्देग सुरू जावये
भांगरभूंय I प्रतिनिधी
पणजी : खण पावणी प्रक्रियेंत सध्याच्या खण कंपनींक लिजां मेळप शक्य आसा. फुडल्या पांच म्हयन्यांत खणी सुरू जातल्यो, अशें आस्वासन मुख्यमंत्री डॉ. प्रमोद सावंत हांणी सभाघरांत दिलें. विजय सरदेसाय हांच्या प्रस्नाचेर बंद आशिल्ल्या खण उद्देगाचेर चर्चा जाली.
खण उद्देग बंद आसा. खण उद्देग सुरू करपा विशी सरकार तारखो दित आसा. पूण खण उद्देग सुरू जायना. बेगिनांत बेगीन खण वेवसाय सुरू जावपा सयत थळाव्या लोकांक रोजगार मेळपाक जाय. पावणे उपरांत भायल्यो कंपनी थळाव्यांक नोकर्यो दितले, हाची हमी सरकार दिता काय? असो प्रस्न विजय सरदेसाय हांणी केलो. हाचे पयलीं खणी चलोवपा खातीर म्हामंडळ स्थापन जाल्ले. त्या म्हामंडळाचे कितें जालें? असो उप प्रस्नूय तांणी केलो.
मिनरल एक्स्पोरेशन अॅन्ड कन्सलटन्सी सर्विसेस (एमईसीएल) हांणी पावणे खातीर 5 ब्लॉक निश्चीत केल्यात. ते भायर 88 लिजांची पावणी जातली. राज्यातले ट्रक तशेंच कामगारांक कामाचेर घेवचे पडटले. सध्याच्या कामगारांक नोकरेंत प्राधान्य मेळटले, हाची कार्यवाही सरकार करतलें, अशें मुख्यमंत्र्यान सांगलें.
गोंयांत लो ग्रेड म्हाल मेळटा. खणी सुरू जाले उपरांत लो ग्रेड म्हालाची निर्गत सुरू जातली. कुडचडें, सांगें, सांवड्डें, मयें, दिवचले, सांखळे, पर्ये ह्या सगल्या मतदारसंघांक खण प्रस्न लागता. म्हज्या मतदारसंघांतले 80 टक्के लोक खण वेवसायाचेर निंबून आसात, अशेंय मुख्यमंत्र्यान सांगलें.
सिंगल इसीची लिजां चड आसात. तशेंच कांय कंपनींनी 2007 पयलीं म्हाल काडून दवरला. ह्या म्हालाची येरादारी जाली, जाल्यार खण उद्देग बेगीन सुरू जावप शक्य आसा, अशी सुचोवणी आमदार गणेश गांवकार हांणी केली. हाचो अभ्यास करून निर्णय घेवपाचें आस्वासन मुख्यमंत्र्यान दिलें. तशेंच जेटीचेर 18 ते 20 मेट्रीक टन म्हाल पडून आसा. ह्या म्हालाची पावणी करपा विशीं निर्णय जातलो.
भायल्या कंपनींक लिजां मेळ्ळी तरी
थळाव्यांक रोजगार मेळटलो
एमएमडीआर कायद्याच्या कलम 88 प्रमाण पावणेची प्रक्रिया सुरू जाल्या. एकूच पर्यावरणीय दाखलो आसा त्या लिजांचो ब्लॉक करून ताची पावणी करतले. पर्यावरणीय दाखलो दुसर्या कंपनीक हस्तांतरण करपाक मेळटा. धा चौखण किलोमिटर परस चड वाठारांतलीं लिजां एकल्याक मेळची नात. हाका लागून एकल्याक चडांत चड 3 लिजां मेळप शक्य आसा. हे अटीक लागून गोंयच्या कंपनींक लेगीत पावणेंत लिजां मेळप शक्य आसा. खण म्हामंडळ लेगीत पावणेंत वांटेकार जावप शक्य आसा. भायल्या कंपनींक लिजां मेळ्ळी तरी गोंयकारांक कामाक घेवपाची अट आसतली, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
