भांगरभूंय | प्रतिनिधी
भांगरभूंय । प्रतिनिधी
फोंडेंः उसगांव पंचायत वाठार खण उद्देगीक वाठारांत येता. लोकांनी प्रदूशणा विशीं हुस्को बाळगुवचो मात प्रदूशण विरयत उद्देग धंदे सुर करपाक विरोध करचो न्हय अशें पंचायत मंत्री माविन गुदिन्हो हांणे उसगांव पंचायत इमारतीच्या उक्तावणा वेळार सांगलें. सैमाचें संवर्धन करून उदरगतीक चालना दिवपाचो सरकाराचो यत्न आसा अशेंय ताणे सांगलें.
गोंय साधन सुविधा उदरगत म्हामंडळा वतीन उसगांव पंचायत मंडळा खातीर ही इमारत बांदल्या. उक्तावणा वेळार भलायकी मंत्री विश्वजीत राण, जिल्हो पंचायत वांगडी उमाकांत गावडे, सरपंच नरेंद्र गांवकार, उपसरपंच संगीता डोईफोडे, स्वयंपूर्ण इश्ट प्रसिद्ध नायक, पंच वांगडी विलियम मस्कारेन्हास, गोविंद फात्रेकार, संजय गावडे, विनोद मस्कारेन्हास हाजीर आशिल्लो.
पंचायत वाठारांत कोयराची समस्या वाडत आसा. सरकारान दरेका पंचायत वाठारांत कोयराचो विलो लावपी प्रकल्प उबारपा खातीर यत्न सुरू केल्यात. मात कांय जाण तांकां विरोध करतात. गांवांतल्या लोकांनी नितळसाणे खातीर कोयर प्रकल्प उबारपाक सहकार्य करपाची गरज आसा अशें गुदिन्होन सांगलें.
उसगांव पंचायत वाठारांतली पियेवपाच्या उदकाची समस्या गांजे हांगा उदका प्रकल्प सुरू जातगीर सुटावी जातली. प्रकल्पाचें काम सुरू आसा. सत्तरी तालुक्यांत कोट्यांनी रुपयांचीं उदरगतीचीं कामां हातांत घेतल्यांत. लोकांचे प्रश्न सुटावो करपा खातीर आमचें सरकार वावुरता अशें विश्वजीत राणेन सांगलें. कार्यावळीचें सूत्रसंचालन अजय बागकारान केलें, सरपंच नरेंद्र गांवकारान येवकार दिलो आनी गोविंद फात्रेकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
