भांगरभूंय | प्रतिनिधी
पणजी पालिकेच्या सध्याच्या मंडळान स्मार्ट सिटी इमेजिन मिशना खाला फक्त पणजेची लूट केली, अशेंच म्हणचें पडटलें. हाका पणजेचे आमदार बाबुश मोन्सेरातूय तितलेच जापसालदार आसात, अशें सगलेच लोक उलयतात. म्हापालिकेचें प्रशासन पुराय कोसळ्ळां. सगले फक्त नांवा पुरतेच आसात. सगली सत्ता आमदारा कडेन आसा, अशें म्हणल्यार अतिताय थारची ना.
सध्या पणजे मेळटा थंय खणून दवरलां. धुल्लाचें साम्राज्य पळोवपाक मेळटा. त्याच- त्याच जाग्यांचेर चार- चार फावटीं खोदकाम, सिवरेज चेंबरां खातीर परत एकदां खणपाक सुरवात जाल्या. मेळटा थंय खणटात. हाका लक्ष्मणरेशा आंखून दिवंक ना. हो सगलो गोंदळ आमदाराच्या तेंक्यानूच चलता अशें तुमकां दिसना? म्हापालिकेचे सगले निर्णय ‘बाॅसा’च्या सुचने प्रमाण जातात, अशेंच म्हणचें पडटलें. कामाचें नियोजन मात्तूय ना. भ्रश्टाचाराक शीम- मेर ना. हाका खंय तरी कांटेरी दुरीग डब्बल इंजिन सरकारान घालपाक जाय.
सध्या पणजे भोंवत जाल्यार म्हातारे जाल्ले पणजेक तरणी करपाक सगले रस्ते खणून दवरल्यात, अशें दिसता. गटारांचो जागो पसून बदल्ला. सगलेच कडेन बांदकाम चालू आशिल्ल्यान येरादारीची कोंयडी जाल्ली पळोवपाक मेळटा. कंत्राटदारांनी अशा जाग्यांचेर आपले मनीस दवरपाक जाय. फलक लावपाक जाय. दुचाकी चलोवपी शाॅर्टकट मारपाचो यत्न करतात. ताका लागून दुसरो फोंडांत पडपाक शकता. धुल्लाक लागून पणजेकारांक आनी हांगा येवप्याक दुयेंसां जावपाची भिरांत आसा.
मुख्यमंत्री मनोहर पर्रीकार हांच्या मेजाचेर एक सुविचार आशिल्लो. ‘इट इज नायस टू बी इंपोर्टंट, बट इट इज मोअर इंपोर्टंट टु बी नायस’. म्हाका दिसता आयचे राजकारणी हें विसरल्यात. वेंचून येतकच कांय फुडारी आपले हात पसरून लोकांक पयस करतात. दुसरे खेप वेंचून आयले काय तांचे हात लोकांक चड पयस करतात. अशा प्रकारच्या राजकारण्यांक लोक एक दीस घराच बसयतात, हें कोणे विसरचें न्हय.
– गजानन बा. नायक भाटकार,
शिवकृपा, आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
