भांगरभूंय | प्रतिनिधी
पणजीः लोकसभा वेंचणुकेच्या काळांत एका वेळार इश्ट आशिल्ले अमित पालेकार आनी अमित पाटकार हांचे मदीं मीना खणीच्या पावणे वेल्यान उबी फुट पडल्या. मुख्यमंत्री डॉ. प्रमोद सावंत हांणी अमित पाटकार हांकां हजार टनांनी मीन गिफ्ट दिलां असो आरोप अमित पालेकार हांणी केलो. जाल्यार हें मीन कायदेशीर प्रक्रियेन घेतिल्ल्याचें रजांव अमिट पाटकार हांणी दिवन पालेकार हांचे आरोप भायरायल्यात.
गोंय कॉंग्रेस प्रदेशाध्यक्ष अमित पाटकार हे मुख्यमंत्री डॉ. सावंत हांचे कडेन तडजोड करीत आयल्यात. विरोधकांक पंक्चर करपा खातीर मुख्यमंत्री जे खण मंत्री आसात तांणी पाटकार हांकां हजारांनी टन मीन गिफ्ट दिल्या, असो गंभीर आरोप पालेकार हांणी केल्लो.
16 एप्रिलांक पाटकार अर्ज करतात आनी 17 एप्रिलांक 25 हजार टन मीनाचें पाटकार हांकां वाटप जाता. उपरांत दुसरो अर्ज 19 एप्रिलात येवन तांकां 20 एप्रिलाक आनी 14 मे तिसरो अर्ज येवन ते 16 मेक मान्यताय मेळून 89 हजार मेट्रीक टन मीनाचे एका दिसा भितर पाटकार वाटप जाता, असो आरोप पालेकार हांणी केलो.
हे विशीं स्पश्टीकरण दितना गोंय कॉंग्रेस प्रदेशाध्यक्ष अमित पाटकार हांणी सांगलें, हे मीनांचे वाटप वर्स जाल्लें त्या वेळार हांव प्रदेशाध्यक्ष नाशिल्लो आनी कुडचड्यार कॉंग्रेशीच्या तिकेटीचेर उबो राविल्लो.
मीनाच्या डंपाची 22 वी पावणी 6 ऑगस्ट 2021 त जाल्ली. हे मीन सर्वोच्च न्यायालयान जप्त करून पावणेक कडिल्लें आनी जो सगळ्यांत चड बोली लायता तांकां हें मीन दिलें. हांवें 6 कोटी सरकारी तिजोरेंत भरून हें मीन घेतलां. हे विशींचे सगळे पावणी दस्तावेज आसात आनी हांवें गोंयचे अर्थवेवस्थेक मजत केल्या.
ही मीनाची येरादारी करपा खातीर उच्च न्यायालयान मार्गदर्शक तत्वां घाल्ली. तरी लेगीत म्हाका सरकारान हें मीन व्हरपाक आडखळी हाडल्यो. फाटपुरवण करून अवमान याचिका घालपाची शिटकावणी दिले उपरांत 4 वर्सांनी म्हाका हें मीन व्हरपाक मान्यताय मेळ्ळी. हांवें म्हजो वेवसाय करप हातूंत चुक कसली हें पालेकार हांणी सांगचें, अशें पाटकार हांणी म्हणलां.
गोंय मुक्त जावचे पयलीं कॉंग्रेसीचें पयलें कार्यालय आमच्या घरांत सुरू जालां. देखून कॉंग्रेस पक्ष हो म्हच्या मुळांत आसा. पक्ष बदललो आसत मात जी पयलीची आरएसएस विचारधारा आसा ती वचना. देखून आरएसएसएसच्या मनशांनी म्हाका प्रमाणपत्र दिवपाची गरज ना, असो थोमणो पाटकार हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
