भांगरभूंय | प्रतिनिधी
भांगरभूंय । प्रतिनिधी
पोरणे गोंयः सान्ताक्रुज पंचायत वाठारांतले खणल्ले रस्ते सारके करपाक सान्ताक्रुज पंचायत मंडळान बांदकाम खात्याक (पीडब्ल्यूडी) 5 मे मेरेन मुजत दिल्या. तो मेरेन ते सारके केले ना जाल्यार लोकां वांगडा रस्तार येवपाची शिटकावणी तांणी दिल्या.
हे संबंदी सान्ताक्रुजची सरपंच जेनिफर ओलिव्हेरा हिणे बांदकाम खात्याच्या कार्यकारी अभियंत्याक नोटीस धाडल्या. चडशे रस्ते खणून उडयल्ल्यान लोकांक येरादारी करपाक सामके त्रास जातात अशें तातूंत नमूद केलां. पोरूं वर्सा डिसेंबर म्हयन्यांत जमनी पोंदचान वीज केबल्स घालपा खातीर रस्ते फोडल्ले. पांच म्हयने जाले तरी खणल्ले रस्ते सारके केले नात. लोकांक चड करून बांद आनी आराडी हांगच्या लोकांक ताचो खूब त्रास जाता अशें उपसरपंच डॉमनीक परेरान सांगलें.
सान्ताक्रज चर्चीचें फेस्त 7 मेक जातलें ताका लागून 5 मे मेरेन रस्ते सारके करपाक आमी बांदकाम खात्याक नोटीस धाडून कळयलां. ना जाल्यार आमकां वेगळो विचार करचो पडटलो, अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
