भांगरभूंय | प्रतिनिधी
16 वर्सां आदीं कामाक सुरवात, आठ दिसां आदीं काम पुराय
भांगरभूंय । प्रतिनिधी
वाळपयः एके वटेन कर्नाटकान म्हादयचेर संकश्ट हाडपाचें कारस्थान रचला. ताका लागून खंयचेच स्थितींत म्हादय न्हंयेचें अस्तित्व नश्ट जावचें ना, हाची विशेश दखल गोंय सरकाराच्या शिंपणावळ खात्यान घेतल्या. खूबशे कडेन बांद बांदपाचें काम सुरू आसा. हे खातीर खूब कडेन बांद बांदल्यात. खडकी वाठारांत 16 वर्सां आदीं बांदिल्ल्या बांदांत व्हड प्रमाणांत उदकाचो सांठो करपाक सुरवात जाल्या. हे खातीर ह्या वाठारांतल्या शिंपणावळीक व्हड संद मेळ्ळ्या. ताका लागून शेतकारांनी शिंपणावळ खात्याचे उपकार मानल्यात.
सुमार 20 वर्सां आदीं सत्तरी म्हालांतल्या न्हंयांचेर खूबशे बांद बांदपाची संकल्पना चालीक लायली. तेन्नाचे सहाय्यक अभियंते प्रमोद बदामी हांणी ते खातीर विशेश फुडाकार घेतिल्लो. तांकां तेन्नाचे मुख्यमंत्री प्रतापसिंह राणे हांणी सगळे तरेचो आदार दिल्लो. ताका लागून आयज सत्तरी म्हालाच्या शेती उदरगतींत ते बांद म्हत्वाचे घटक जाल्यात.
खडके पुला पोंदा आशिल्ले न्हंयेचेर बांद बांदिल्लो, मात त्या बांदाचें काम खूबशा पांवड्यार आडकून उरिल्लें. तें काम पुराय जाले उपरांत त्या बांदांत व्हड प्रमाणांत उदकाचो सांठो जावपाक लागलो. सध्या हो बांद उपाट भरला. ह्या बांदांतल्या उदकाच्या सांठ्याचेर खडकी, नाणूस अशा विवीध वाठारांतल्या न्हंये देगेर आशिल्ल्या बागायतींक उदकाची पुरवण करतात. नाणूस वाठारांत आशिल्ल्या उपसा येवजणेच्या माध्यमांतल्यान खूबशा वाठारांनी उदकाची सुविधा मेळ्ळ्या. मात मदल्या काळांत ह्या बांदांत उदकाचो सांठो जावप बंद जाल्ल्यान शेतकारांक खूबश्या समस्यांक फुडो करचो पडटालो.
सध्या कर्नाटकान म्हादयचें उदक घुंवडावपाचे यत्न चल्ल्यात. ताका लागून फुडारांत गोंयांत उदक आडयात उदक जिरयात ही येवजण खरपणान चालीक लावप गरजेचें आसा. हे नदरेन ह्या बांदाचेर शिंपणावळ खात्यान विशेश लक्ष दिवन ताचें काम पुराय करून आठ दिसां आदीं ह्या बांदांत उदक सांठोवपाक सुरवात केल्या.
ह्या बांदाचें काम पुराय जावन उदकाचो सांठो करपाक सुरवात जाल्या. हो बांद पुराय जावचो हे खातीर साबार पांवड्या वयल्यान मागणी जाताली. हो वावर पुराय करचे खातीर मुखेल अभियंते प्रमोद बदामी हांणी विशेश आदार दिल्ल्यान अंदूंच्यान उदकाचो सांठो करपाक सुरवात जाल्या, अशी म्हायती वाळपय शिंपणावळ सहाय्यक अभियंते शैलेश पोकळे हांणी सांगलें. ह्या बांदाच्या उदकाचो साठो शेती, बागायती खातीर खुबूच फायद्याचो आसा. ताका लागून फुडारांत ह्या उदकाचेर ह्या वाठारांतल्या शेती उत्पादनाक विशेश आदार मेळटलो आनी शेती बागायतींक बरे तरेची चालना मेळटली, अशेंय पोकळे हांणी सांगलें.
बांद शेतकारां खातीर खुबूच फायद्याचोः बदामी
हो बांद शेती बागायतीचे नदरेन खुबूच म्हत्वाचो आसा. मात बांदकामा करतना कांय प्रमाणार अडचणी निर्माण जाल्ल्यो. ताका लागून ताचें काम आडकल्लें. आतां तें पुराय जालां. ते खातीर विशेश योगदान दिवपी वाळपय शिंपणावळ खात्याच्या अधिकाऱ्यांचें कवतूक. ह्या बांदाचो ह्या वाठारांतल्या शेतकारांक खूब फायदो जातलो, अशें शिंपणावळ खात्याचे मुखेल अभियंते प्रमोद बदामी हांणी प्रतिनिधी कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
