भांगरभूंय | प्रतिनिधी
-सालसेत ट्रायबल फोरम वतीन गुणेस्त विद्यार्थ्यांचो भोवमानमडगांवः आरक्षणाचो, येवजण्यांचो फायदो घेतना आदिवासी समाजान ह्यो सुविधा कोणाक मेळ्ळे हाची याद दवरची. आदिवासी समाजाचे फुडारी, लोकांनी खंयच्याय पक्षा वांगडा रावचें, पूण समाजा खातीर वावुरतना एकवट दाखोवचो. तुमी तुमचें पुराय जिवीत दुसऱ्यांक मतां मारीत घालयल्यार फुडारी जल्माक येवचे नात. देखून विधानसभेंत वचपाचो अधिकार मागचो. हाका लागून फुडारी निर्माण जातले आनी समाजाक तेंको मेळटलो अशें मंत्री गोविंद गावडे हांणी सांगलें.
सालसेत आदिवासी मंचान मडगांव रवींद्र भवन सभाघरांत आदिवासी समाजांतल्या साश्टीच्या गुणेस्त विद्यार्थ्याचो भोवमान सुवाळो आयोजीत केलो. कला आनी संस्कृती मंत्री गोविंद गावडे, उटा अध्यक्ष प्रकाश वेळीप, संस्थेचे अध्यक्ष रोमाल्डो गोन्साल्वीस आनी हेर लोक ह्या वेळार हाजीर आशिल्ले. धावी आनी बारावी वर्गांतल्या गुणेस्त विद्यार्थ्यांचो मानेस्तांनी भोवमान केलो. ह्या वेळार मंत्री गोविंद गावडे हांणी सांगलें, सालसेत आदिवासी मंचान समाजांतल्या गुणेस्त लोकांक भोवमान केला आनी तांकां प्रोत्साहन दिलां. येस एका दिसांत मेळना. अणभव घेवन मार्ग आपणायल्यार तुमकां येस मेळटलें हें निश्चीत. अभ्यासाची वृत्ती, कश्ट करपाची तयारी. परिस्थितीचेर रडून येस मेळूंक शकना. ते परिस्थितीक तोंड दिवपी लोकांनीच आपली परिस्थिती बदलून येस मेळयतात असो सल्लो तांणी विद्यार्थ्यांक दिलो. तशेंच आरक्षण मेळोवपा खातीर आदिवासी समाजाक झगडचें पडलें आनी ही झगडीं उटा संघटणेन केल्ली. भुरग्यांक मेळिल्ली सुविधा कशी मेळ्ळी तेंय कळपाक जाय. तशेंच, उटा संघटणा 6 ऑक्टोबराक 20 वर्सां पुराय करतली. सैमीक संकश्टाची शिटकावणी दिल्ल्यान ही कार्यावळ 10 नोव्हेंबराक जातली. ह्या वेळार सगल्यांक हाजीर रावपाचो उलो तांणी मारला.
आदले मंत्री प्रकाश वेळीप हांणी सांगलें, भुरग्यांक आतां जी शिक्षणीक संद मेळ्ळ्या ताचो फायदो घेवपाची गरज आसा. पयलीं शिक्षणाची सुविधा नाशिल्ली, घरांची परिस्थिती नाशिल्ली पूण आतां तशें ना. आरक्षणाक लागून शिक्षण आनी नोकरेच्यो संदी मेळटात. समाजाक मेळिल्ल्या आरक्षणाक लागून समाजांतले 400 लोक राजपत्रीत अधिकारी जाल्यात. समाजाचे उदरगती खातीर समाजांतले वेगवेगळे घटक एकठांय येवपाची गरज आसा, तेन्नाच समाजांतले प्रस्न सोडोवपाक आमी येसस्वी जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
