भांगरभूंय | प्रतिनिधी
कोची, खबरां संस्था ः वैयक्तीक निर्णय घेतना बायलेक आवयचें वा मायचें मत घेवपाचें अशें कसलेंच बंधन ना. बायलां आपल्या आवयची वा घोवाचे आवयची (माय) गुलाम नात, अशें केरळ उच्च न्यायालयान घटस्फोटाच्या याचिकाचेर सुनावणी करतना म्हणलां.
केरळ उच्च न्यायालयाचे न्यायाधीश देवन रामचंद्रान वयलीं टिप्पणी केल्या.
एके बायलेन त्रिसूर कुटुंब न्यायालयांत घटस्फोटाची याचिका दाखल केल्ली. ती न्यायालयान न्हयकारली. ह्या कुटुंब न्यायालयान घोव- बायलेक आपले मतभेद विसरून लग्न जिणेची पवित्रताय तिगोवन दवरपाचो सल्लो दिल्लो. उपरांत ही बायल आपल्या पुता वांगडा कोट्टरकारा हांगाच्या आपल्या पुर्वजांच्या घरा रावपाक गेली. थंयच्यान ती कामाक लागून माहे ह्या वाठारांत गेली. माहे लागसार आशिल्ल्या तलासरी हांगाच्या कुटुंब न्यायालयांत घटस्फोटाची याचिका दाखल करपाची विनवणी बायलेन त्रिशूर न्यायालयाक केल्ली. ताका न्हयकार दिल्ल्यान ती उच्च न्यायालयांत गेली. हाचेर न्या. रामचंद्रान कुटुंब न्यायालयान तिडक काडली.
तिका कुटुंब न्यायालयान सल्लो दिल्लो. घोवाच्या वकिलांनी हे विशीं उच्च न्यायालयाक कळयलें. बायलेक घटस्फोट जाय ती कारणां सादीं आसात. आवय वा माय कडेन उलयल्यार हें सुटावें जाव येता. देखून तिणें उलोवंक जाय. तशेंच न्यायालयांत वचचे परस भायर उपाय सोदून काडूंक मेळटा अशें घोवाच्या वकिलान सांगलें. पूण उच्च न्यायालयान तें मान्य करूंक ना. एक बायल तिच्या आवयक वा मायक विचारुन निर्णय घेवपाक ती तांची गुलाम न्हय. तशेंच ती तयार ना जाल्यार वाद न्यायालयाच्या भायर निवळावंक मेळना. तिकाय एक मन आसता. तिका स्वताचो निर्णय घेवपाचें स्वातंत्र्य आसा. कुटुंब न्यायालयातल्या निर्णयांतल्यान दादले प्रधान समाजाची मानसिकताय दिसून येता अशें न्यायालयान स्पश्ट केलां.
मजगतीं, बायलेची आवय वा माय व्हडली आसता. देखून याचिका बदली जाल्यार दर खेपे तांकां प्रवास करप परवडचें ना असो युक्तिवाद घोवाच्या वकिलांन केलो. पूण तेंय उच्च न्यायालयान न्हयकारलें. घोवाची आवय गरज पडल्यार व्हिडियो कॉन्फरन्सिंगांतल्यान कुटुंब न्यायालयांत हजर जावंक शकता अशें सांगून उच्च न्यायालयान याचिकेची बदली करपाक परवानगी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
