भांगरभूंय | प्रतिनिधी
मडगांव : श्रीनिवास थोरावत ह्या रिअल इस्टेट वेवसायीका कडेन दोन कोटींची खंडणी मागिल्ली. ह्या प्रकरणांत अटक केल्ल्या वॉल्टर फर्नांडीस हाचे सयत चार दुबावितांचे पुलीस बंदखणींत वाड केली.
२ कोटींची खंडणी मागिल्ल्या प्रकरणांत तिरुपती वारकुरी आनी हेर दुबावितां आड थोरावत हांणी फातोड्ड्यां पुलिशेंत कागाळ दिल्या. ते प्रमाण, लेबर कंत्राटदार आशिल्ल्या तिरुपती हांचे कडेन २०१७ वर्सा वळख जाली. तांचे वांगडा आगाळींतल्या एका अपार्टमेंटाचें काम करीत मे २०१९ वर्सा कामाचें पयशेय दिले. उपरांत बाणावलेय एका बंगल्याचें काम हातांत घेतिल्लें, थंयचे कामाचे पयशे वेगवेगळे दिले तरी कामाक कळाव केलो. तांणी केल्ल्या कामा परस चड पयशे फारीक केल्ले. जानेवारी २०१४ वर्सा तिरुपतीन आपणा कडेन १.३० कोटी किमतीचो बेळगांवच्या नव्या प्रकल्पांतलो फ्लॅट दिवपाची मागणी केली. मात ताका न्हयकार दिलो. १३ ऑगस्टाक वळखीच्या नसीर शेख हाका कॉल आयलो आनी तांणी तिरुपतीच्या सांगण्यावेल्यान कांय जाण कुटुंबीयांचेर नजर दवरून आशिल्ल्याचें सांगून तांकां मेळपाक सांगलें.
१४ ऑगस्टाक चौगुले कॉलेजी लागसार हॉटेलांत थोरावत हांकां मेळपाक आपयिल्ले. तिरुपती आनी तांचे वांगडा आशिल्ल्या अनवळख्यांनी वॉल्टरचे सहकारी आशिल्ल्यान आपले पुलिसां कडेनूय खूब बरे संबंद आसात. दोन कोटी दिवंक ना जाल्यार कुटुंबीयांचे सुरक्षिततेचो प्रस्न निर्माण जावपाची धमकी दिली. ह्या प्रकरणांत कारवाय करपाची मागणी आनी कुटुंबीयांक सुरक्षा दिवपाची मागणी केल्ली.
ह्या प्रकरणांत पुलिसांनी तपासा उपरांत दुबावीत तिरुपती वारुकरी, वॉल्टर फर्नांडीस, रोहित फळदेसाय आनी विनोद थोताड हांकां अटक केल्ली. ताची चार दिसांची पुलीस बंदखण पुराय जाल्ल्यान शुक्रारा तांकां न्यायालयांत हजर केले. तांचे पुलीस बंदखणींत तीन दिसांची वाड केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
