भांगरभूंय | प्रतिनिधी
आयज हांगा जावपी तिसरे आनी निमाणे वन डे मॅचींत ऑस्ट्रेलियेक हारोवन तीन मॅचींचे माळेंत 3-0 असो धूप करून संवसारीक सर्तीचे तयारेचेर निमाणो हात भोंवडपाचो भारताचो यत्न आसतलो.
वन डे क्रिकेटीच्या इतिहासांत भारतान अजून मेरेन ऑस्ट्रेलिये आड क्लीन स्वीप करूंक ना. पूण, हे खेपे भांगराळी संद ताचे कडेन आसा.
भारत सध्या उत्कृश्ट फॉर्मांत आसा. मुखेल खेळगड्यांचे गैरहाजेरेंत लेगीत भारतान फाटल्यो दोनूय मॅच सहज जिखल्यात. संवसारीक सर्ती पयलीं चडश्या खेळगड्यांक खेळपाची संद मेळची हें पंगड वेवस्थापनान आदींच निश्चीत केल्लें.
माळ 3-0 फरकान जिखल्या उपरांत पांच खेपेचो संवसारीक वस्ताद ऑस्ट्रेलिये आड मानसीक रितीन आघाडी मेळटली. भारत संवसारीक सर्तींतली आपली पयली मॅच 8 ऑक्टोबराक ऑस्ट्रेलिया पंगडा आड खेळटलो.
दोनूय पंगडांनी पयल्या दोन मॅचीं खातीर साबार बदल केल्ले. पूण, भारताचें दालें जड उरलें.
आयचे मॅची खातीर फॉर्मांत आशिल्ल्या शुभमन गिलाक विसव दिला. ताणें पयले मॅचींत 74 आनी दुसरे मॅचींत 104 धांवड्यांची खेळी केल्ली. गिलान अंदूं वन डे प्रकारांत 72.35चे सरासरीन 1230 धांवड्यो केल्यात. मुखेली रोहित शर्मा आनी विराट कोहली हे मॅचींत खेळटलें हें निश्चीत आसा. फॉर्मांत आशिल्ले कुलदीप यादव आनी हार्दिक पांड्या लेगीत दोन मॅचींचे विसवा उपरांत पुनरागमन करतले.
कांय सप्तकां पयलीं भारताचो पंगड आशिया करंड सर्त खेळपाक श्रीलंकेक गेल्लो. त्या वेळार खंयच्या खेळगड्याक पंगडांत सुवात दिवची आनी कोणांक दिवची न्हय हे विशीं समस्या उप्रासतली अशें निवड समितीक लेगीत दिसूंक नाशिल्लें.
ईशान किशन, सुर्यकुमार यादव, मोहम्मद शमी आनी मोहम्मद सिराज हे सगळे मॅच विनस सिद्ध जाल्यात. दुखापती कडेन झुजपी श्रेयस अय्यरान पुर्ण बरो जावंक पंगडांत पुनरागमन केलें आनी इंदोरांत जाल्ले मॅचींत शेंकडो लेगीत मारलो. लोकेश राहुलान पयल्या दोन मॅचींनी बरे तरेन पंगडाचें फुडारपण केलें तशेंच ताणें धांवड्यो लेगीत केल्यो. फास्ट बॉलर जसप्रीत बुमरान लेगीत आपलो फॉर्म आनी तंदुरुस्ती मेळयल्या.
ऑस्ट्रेलिया पंगड अशे तरेन केन्ना हारना. फाटल्या पांच मॅची सावन चालू आशिल्लो हारीचो क्रम मोडपाचो ताचो यत्न आसतलो. संवसारीक सर्ती पयलीं ऑस्ट्रेलियेची ही निमाणी मॅच आसा. ताका लागून हे मॅची खातीर पॅट कमिन्स आनी स्टार्क हांकां खेळोवपाक पंगड इत्सूक आसतलो. ट्रॅव्हिस हेड, स्टीव स्मिथ आनी मार्नस लाबशेन हांच्या कडल्यान पंगडाक धांवड्यांची आस्त आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
