क्लासेनाचे खेळीन इंग्लंड हुबलो

भांगरभूंय | प्रतिनिधी

संवसारीक वन डे क्रिकेट सर्तींत काल जाल्ले दुसरे मॅचींत दक्षीण आफ्रिका पंगडान सध्याचो वस्ताद इंग्लंड पंगडाक 229 धांवड्यांनी हारयलो.

400 धांवड्यांचो फाटलाव करपी इंग्लंडाचो डाव 22 ओव्हरींनी 170चेर सोंपलो.

आफ्रिकेन व्हड जैत जोडून सर्तींतलो आपलो शेक परतून कायम केलो. इंग्लंडाची वन डे क्रिकेट सर्तींतली ही व्हड हार थारली. हे हारीक लागून इंग्लंड गुणतकट्यांत णववे सुवातेर घसरलो. इंग्लंड आनी अफगाणिस्तान हांकां चार मॅचींतल्यान फकत एक जैत मेळोवप शक्य जालां. तांचे समान दोन गूण आसात. पूण, इंग्लंडाची नेट रनरेट -1.248 आनी अफगाणिस्तानाची नेर रनरेट -1.250 अशी. इंग्लंड .002च्या फरकान णववे सुवातेर आसा.

मजगतीं, दक्षीण आफ्रिकेन पयलीं बॅटींग करतना 50 ओव्हरींनी 7 विकेटी वगडावन 399 धांवड्यो केल्यो. हॅन्री क्लासेनान आक्रमक बॅटींग करून 109 धांवड्यांची खेळी केली. जाल्यार मार्को येनसेनान 75 धांवड्यो केल्यो. रिझा हेंड्रिक्सान 80 धांवड्यांचें योगदान दिलें.

रेसे टॉप्लेन 88 धांवड्यो दिवन इंग्लंडा वतीन सगल्यांत चड 3 विकेटी घेतल्यो. ताचे खेरीत गस एटकीन्सनान आना आदील रशीद हाणें दरेकी दोन विकेटी मेळयल्यो.

आफ्रिकेन दिल्ले 400 धांवड्यांचे मोखीचो फाटलाव करपाक मैदानांत देंवपी इंग्लंडाची सुरवात बरी जाली ना. मार्को येनसेन, कागिसो रबाडा आनी लुंगी एन्गिडी हांणी इंग्लंडाची स्थिती 4 बाद 38 अशी करून सोडली. जॉनी बॅयरस्टो (10), डॅव्हिड मलान (6), जो रूट (2) आनी अंदूंची सर्तींत पयली मॅच खेळपी बेन स्टोक्स 95) सावय भितर बाद जाले.

ते उपरांत मुखेली जॉस बटलर आनी हॅरी ब्रुक्स हांणी डाव सांबाळपाचो यत्न केलो. पूण, आफ्रिकेच्या गेराल्ड कोट्झीन तीन विकेटी घेवन इंग्लंडाची अवस्था 7 बाद 84 अशी केली. ते उपरांत डॅव्हिड विली आनी एटकिनसन हांणी इंग्लंडाक शंबराचो आंकडो हुपून दिलो.

पूण, विली बाद जाल्या उपरांत मार्क वुडान 17 बॉलांनी 43 धांवड्यो करून इंग्लंडाक 170 धांवड्यां मेरेन मजल मारून दीत पंगडाची लज राखली. अखेरेक एटकिनसनाक 35 धांवड्यांचेर बाद करून आफ्रिकेक व्हड जैत मेळोवन दिलें. टोप्ले दुखापतीक लागून बॅटींग करपाक आयलो ना.