भांगरभूंय | प्रतिनिधी
पणजीः राष्ट्रीय शिक्षण धोरण (एनईपी) चालीक लावपा खातीर म्हाविद्यालयांक एकठांय करून क्लस्टर विद्यापीठ थापणूक करपाचो प्रस्ताव आसा. हे खातीर सरकारान भौशीक विद्यापीठ विधेयक सभाघरांत सादर केले. ह्या विधेयकाच्या अभ्यासा खातीर स्थापन केल्ले चिकित्सा समितीची पयली बसका 22 ऑक्टोबराक जातली. राज्याच्या उच्च शिक्षणांत म्हत्वाचे बदल करपाची तरतूद ह्या विधेयकांत आसा. हाका लागून सगळ्यांचें लक्ष चिकित्सा समितीचे बसकेचेर आसा.
एकाच विद्यार्थ्याक एका परस चड विशयांत पदवी मेळोवप शक्य जावप हे खातीर म्हाविद्यालयांक एकठांय करून क्लस्टर विद्यापीठ थापणूक करपाचो प्रस्ताव आसा. हाका लागून म्हाविद्यालयांक स्वताचो अभ्यासक्रम तयार करुन परिक्षा घेवपाक मेळटल्यो. तशेंच निकाल लेगीत म्हाविद्यालयाच जाहीर करतले. हे खातीर गोंय भौशीक विद्यापीठ विधेयक सरकारान पावसाळी अधिवेशनांत मांडलें. विरोधकांनी मागणी केले उपरांत विधेयक चिकित्सा समिती कडेन धाडपाचें थारायलें.
उदका स्रोत मंत्री सुभाष शिरोडकार हांच्या अध्यक्षते खाला चिकित्सा समिती स्थापन केल्या. आलेक्स सिक्वेरा, कृष्णा साळकार, विजय सरदेसाय, कार्लुस फेरेरा, विरेश बोरकार, डॉ. देविया राणे आनी निलेश काब्राल हे चिकित्सा समितीचे हेर वांगडी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
