भांगरभूंय | प्रतिनिधी
क्रोएशियान संवसारीक फुटबॉल सर्तीचे सेमी फायनलींत पयलेच खेपे सुवात मेळोवपी मोरोक्कोक तिसरे सुवाते खातीर जाल्ले मॅचींत 2-1 अशा गोल फरकांनी हारयलो.
फाटले खेपे उपवस्तादपण जोडपी क्रोएशियान अंदूंचे संवसारीक सर्तींत एक पांवडो सकयल येत तिसरे सुवातेर समाधान मानलें. मॅचीच्या पयल्या धा मिनटां भितर दोन गोल पडले.
आफ्रिका खंडाच्या मोरोक्को पंगडान अंदूंचे संवसारीक फुटबॉल सर्तींत जबरदस्त प्रदर्शन करतना सेमी फायनली मेरेन मारिल्ली. संवसारीक फुटबॉल सर्तीच्या इतिहासांत सेमी फायनली मेरेन पावपी मोरोक्को हो आफ्रिका खंडांतलो पयलोच देश थारिल्लो. ताका तिसरे सुवाते खातीर जाल्ली मॅच जिखून इतिहास घडोवपाची संद आशिल्ली. पूण, क्रोएशियान ताचे संपन भंगयलें.
फ्रान्सान दुसरे सेमी फायनलींत मोरोक्कोक 2-0 असो हारयिल्लो, जाल्यार पयले सेमी फायनलींत अर्जेंटिनान क्रोएशियाक 3-0 असो हारयिल्लो.
मॅचीच्या पयल्या 10 मिनटां भितर नेटाचें आक्रमण प्रतीआक्रमण पळोवपाक मेळ्ळें.
क्रोएशियाच्या जोस्को ग्वारदिओलान सातव्या मिनटाक मोरोक्कोचो गोलपोस्ट भेदलो. मॅचीची धा मिनटां लेगीत पुर्ण जावंक नाशिल्ली. त्या वेळार क्रोएशियान 1-0 अशी आघाडी घेतली. पूण, क्रोएशियाक ह्या गोलाचो आनंद दोन मिनटां लेगीत मनोवपाक मेळूंक ना. अचरफ दारीन णवव्या मिनटाक गोल करून मोरोक्कोक मॅचींत 1-1 असो बरोबरींत हाडलो.
ते उपरांत दोनूय पंगडांनी एकामेकाच्या गोलपोस्टाचेर हल्ले सुरू केले. अखेरेक पयलें अर्द सोंपपाक कांय मिनटां बाकी आसतना मिसाव्ह ओसरिचान 42व्या मिनटाक गोल करून क्रोएशियाक 2-1 अशी आघाडी मेळोवन दिली.
मजगतीं, दुसऱ्या अर्दांत मोरोक्कोन बरोबरी सादपाचो खूब यत्न केलो. पूण, अखेरेक मेरेन ताका गोल करपाक जमलो ना आनी अशे तरेन क्रोएशियान मॅच 2-1 फरकान जिखली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
