भांगरभूंय | प्रतिनिधी
पणजी ः कांय दिसा आदीं गोंयांत हणजुण्यां एका पोशिल्ल्या पिटबूल सुण्यान सात वर्सां पिरायेच्या भुरग्याचेर हल्लो केल्लो. उपरांत त्या भुरग्याक मरण आयिल्लें. ते उपरांत गोंय सरकारान विदेशी जातींच्या क्रूर सुण्यांक पोसपाचेर खर निर्बंध घाल्ले. तेच वेळार सरकार ‘विदेशी’ सुण्यांची नोंदणी करपा खातीर घेवपी शुल्क वाडोवपाचो विचार करतालें. मजगतीं, सरकारान हे संबंदी वेगवेगळ्या लोकां कडल्यान आनी संबंदीत तज्ञां कडल्यान सुचोवण्यो मागल्यात. फुडल्या कांय दिसांनी चर्चा करून नवें धोरण तयार करतले अशी म्हायती मुखार आयल्या.
मजगतीं, नव्या मार्गदर्शक तत्वां खाला पाळीव सुण्यांच्या धनयांनी आपल्या पाळीव सुण्यांची नोंदणी करप गरजेचें आसा. सध्या विदेशी जातींच्या सुण्यांच्या नोंदणी खातीर 5 हजार रुपया आनी थळाव्या जातींच्या सुण्यांच्या नोंदणी खातीर फकत 100 रुपया घेतात. सध्या नोंदणी नाशिल्ल्या सुण्यांची 31 डिसेंबर 2024 मेरेन नोंदणी करप गरजेचें आसा. नोंदणी करपाक कळाव जाल्यार दुपेटीन शुल्क घेतले. पूण सरकार हे शुल्काचेर परतून विचार करपाक शकता.
6 सप्टेंबराक जारी केल्ले अधिसुचोवणे प्रमाण पाळीव जनावरांक लागून जखमी जाल्यार धनयांनी प्रतिज्ञापत्र सादर करप सक्तीचें आशिल्लें. ही अधिसुचोवणी 2023 वर्सा जारी केल्ल्या मार्गदर्शक तत्वांच्या तरतुदींचो एक भाग आसा. चवथी पयलीं जारी केल्ले अधिसुचोवणेंत भारतीय न्याय संहिते खाला आनी जनावर क्रूर प्रतिबंध कायदो आनी नेमा खाला जनावरांच्या धनयांचेर कारवाय करपाची तजवीज आसा. तशेंच उल्लेख केल्ल्या जनावराच्या धनयान जनावराच्या हल्ल्यांत जखमी जाल्ल्यांक लुकसाण भरपाय दिवची अशी तरतूद आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
