भांगरभूंय | प्रतिनिधी
काँग्रेस : सुरक्षा उपकरणां नाशिल्ल्यान प्रवास धोक्याचो
भांगरभूंय । प्रतिनिधी
पणजी : उजो पालोवपाचीं उपकरणां आनी आपत्ती वेवस्थापन यंत्रणेचो उणाव आशिल्ल्यान गोंयांत क्रूज आनी फेरीबोटी प्रवाशां खातीर धोक्याच्यो थारल्यात. बिठ्ठोणां क्रूज बोटीक लागिल्ल्या उज्याचे फाटभुंयेर गोंयांतल्या सगळ्या क्रूज बोटींचें 15 दिसां भितर सुरक्षा ऑडीट करपाची काँग्रेसीन मागणी केल्या.
प्रदेश काँग्रेस अध्यक्ष अमीत पाटकार हांणी काँग्रेस हावसांत पत्रकार परिशद घेतली. ह्या वेळार तांणी बोटींचे सुरक्षेचें ऑडीट करपाची मागणी केली. तशेंच क्रूज बोटी आनी फेरीबोटींनी उण्यांत उण्या सुरक्षेच्या उपकरणांचो उणाव आशिल्ल्यान शिरगांव सारकी दुर्घटणा बोटीचेर जावंक शकता अशी शक्यताय तांणी उक्तायल्या.
फाटल्या सप्तकांत बिठ्ठोणां क्रूज बोटीक उजो लागलो. हो उजो सकाळीं लागिल्ल्यान कोणाक कांय जावंक ना. पर्यटक वा प्रवासी आसतना हो उजो लागिल्लो जाल्यार शिरगांव सारकी दुख्खदिणी घडणूक परतून घडपाची. बंदर कप्तान (कॅप्टन ऑफ पोर्टस) आनी सरकारान ह्या उज्या पसून धडो घेवपाची गरज आसा. दिवाडे लेगीत फेरीबोटीक उजो लागपाची घडणूक घडल्या. हे खेपे कर्मचाऱ्यांनी न्हंयेच्या उदकाचो उपेग करून उजो पालोवपाचो यत्न केलो. क्रूज बोट आसूं वा फेरीबोट आसूं, आपत्कालीन यंत्रणा वा सुरक्षेचीं उपकरणां उपलब्ध नात. हे फाटभुंयेर गोंयांतल्या सगल्या बोटींचें सुरक्षा ऑडीट करचें. हजारांनी लोक फेरीबोटींतल्यान प्रवास करतात. फेरीबोटींचेंय सुरक्षेचें ऑडीट करपाक जाय, अशें पाटकार हांणी मागलें.
‘आडनदर संकश्टाक आमंत्रण दितली’
बंदर कप्तान खात्यांत रेडिओ अधिकारी आनी सुरक्षा अधिकारी हांची नेमणूक जावंक ना. हाका लागून नव्या बोटींक परवानो दितना बोटींची तपासणी कोण करता? हो प्रस्न आसा. बंदर कप्तान खातें तशेंच सरकार बोटी आनी फेरीबोटींचे सुरक्षे कडेन आडनदर करता. ही आडनदर व्हड संकश्टाक आमंत्रण दिवपाक शकता अशी शिटकावणी अमीत पाटकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
