भांगरभूंय | प्रतिनिधी
पणजीः उजो पालोवपाचीं उपकरणां आनी आपत्ती वेवस्थापन यंत्रणेचो उणाव आशिल्ल्यान राज्यांत क्रुज आनी फेरीबोटी प्रवाशां खातीर धोक्याच्यो थारल्यात. बिठ्ठोणा क्रुज बोटीक लागिल्ल्या उज्याचें फांटभूंयेर राज्यांतल्या सगळ्या क्रूज बोटींचें 15 दिसां भितर सुरक्षा ऑडिट करपाची काँग्रेसीन मागणी केल्या.
प्रदेश काँग्रेस अध्यक्ष अमित पाटकार हांणी काँग्रेस हावसांत पत्रकार परिशद घेतली. ह्या वेळार तांणी बोटींचे सुरक्षेचें ऑडिट करपाची मागणी केली. तशेंच क्रूज बोटी आनी फेरी बोटींनी उण्यांत उणी सुरक्षेच्या उपकरणांचो उणाव आशिल्ल्यान शिरगांव सारकी दुर्घटना बोटीचेर जावंक शकता अशी शक्यताय तांणी उक्तायल्या.
फाटल्या सप्तकांत बिठ्ठोणा क्रूज बोटीक उजो लागलो. हो उजो सकाळीं लागिल्ल्यान कोणाक कांय जावंक ना. पर्यटक वा प्रवासी आसतना हो उजो लागिल्लो जाल्यार शिरगांव सारकी दुख्खद घडणूक परतून घडपाची. बंदर कप्तान (कॅप्टन ऑफ पोर्टस) आनी सरकारान ह्या उज्या पसून धडो घेवपाची गरज आसा. दिवाडींत फेरीबोटीकय उजो लागपाची घडणूक घडल्या. हे खेपे कर्मचाऱ्यांनी न्हंयच्या उदकाचो उपेग करून उजो पालोवपाचो यत्न केलो. क्रूज बोट आसूं वा फेरी बोट आसूं, आपत्कालीन यंत्रणा वा सुरक्षेचीं उपकरणां उपलब्ध नात. हे फाटभुंयेर राज्यांतल्या सगल्या बोटींचें सुरक्षा ऑडिट करचें. हजारांनी लोक फेरीबोटींतल्यान भोंवतात. फेरीबोटींचेंय सुरक्षेचें ऑडिट करपाक जाय.
तशेंच बंदर कप्तान खात्यांत रेडिओ अधिकारी आनी सुरक्षा अधिकारी हांची नेमणूक जावंक ना. हाका लागून नव्या बोटींक परवानो दितना बोटींची तपासणी कोण करता? हो प्रस्न आसा. बंदर कप्तान खातें तशेंच सरकार बोटी आनी फेरीबोटींच्या सुरक्षे कडेन दुर्लक्ष करता. हे दुर्लक्ष व्हड संकश्टाक आमंत्रण जावंक शकता अशी शिटकावणी अमित पाटकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
