क्रिस्ती प्रजेक भागी करूंक बिशॉप आग्नेल पाठ थारूं

भांगरभूंय | प्रतिनिधी

प्रेरणा आनी जिविताचें पवित्र पयण करूंक कारण थारिल्लो फादर आग्नेलो हाची व्हडवीक गायले बगर कशेंच रावूंक जायना.
खुशालकाय विकती घेवंक मेळना, ती देवाचे कृपेन व्हांवून येता. हे खुशालकायेक शीम आसना. 5 जुलय 2021 दिसा, फातोंड्डेचो अँथनी रेबेलोक आफ्रिकेच्या बोत्सवानाचो बिशॉप नेमला म्हूण बातमी आयली. काळजांत इतलें व्हड खोशेचें ल्हार आयलें की दोळ्यांतल्यान दुकां गळूंक लागलीं. कित्याक रायचे एस. वी. डी. सिमिनारींत आसतना तो कितलेच फावटीं आमगेर येवन गेला. अशीच, 14 फेब्रुवारी 2026 दिसा, रायचो फादर आग्नेलो पिन्हेरोक सिंधुदुर्ग दियोसिजीचो बिशॉप नेमला म्हूण बातमी आयकली आनी परत एक फावट खुशालकायेक शीम उरली ना. तोय आमगेर येवपी आशिल्लो. 1980 च्या काळांत सांत तेराजाच्या हाताक उमो घेवपाचें भाग फावो जाल्लें. तेन्नाच्यान म्हज्या जिवितांत भागीं पावलां भितर सरलीं. म्हाका प्रेरणा आनी जिविताचें पवित्र पयण करूंक कारण थारिल्लो फादर आग्नेलो हाची व्हडवीक गायले बगर कशेंच रावूंक जायना.

रायकारांक आनीक एक पाख

राय गांवांत जायते पाद्री जावन गेले, पूण फादर आग्नेलो हो बिशॉप  जावपी पयलो रायकार.  म्हणून ‘वाग’ म्हण वळखुपी रायकारांक आनीक एक पाख फावो जालें. फादर आग्नेलोचो जल्म 6 जुलय 1972 दिसा रायच्या सांतेमळ वाड्यांत जालो. ताचें पुराय नांव फ्रांसिस्को आंतोनियो आग्नेलो जासिंतो पिन्हेरो, पूण ताका फादर आग्नेलो पिन्हेरो ह्याच नांवान वळखतात. 1988 वर्सा एसएससी पुराय केले उपरांत ताणें धुळेराचे मायनर सिमिनारींत प्रवेश घेतलो आनी 1990 वर्सा म्हापशेंच्या सेंट झेवियर उच्च माध्यमीक स्कुलांत ताणें बारावेची परिक्षा पास केली आनी गोंय राज्य बारावेचे मंडळ परिक्षेंत चवथो क्रमांक मेळयलो. 

जून 1991 वर्सा  ताणें राशोलचे पॅट्रिआर्कल सिमिनारींत पाद्रीपणाच्या अभ्यासाची सुरवात केली. ल्हानपणांतल्यान तो हेच सिमिनारींत वाडलो म्हणल्यार जाता. ल्हान आसतना ऑल्टर बॉय, मागीर सिमिनारीस्त, उपरांत पाद्रीपणाचें शिकप आनी थंयच प्राध्यापक. हांसत्या मुखामळाचो पिन्हेरो हाणें 1991- 1993 आनी 1996- 2000 ह्या काळांत राशोलचे पॅट्रिआर्कल सिमिनारींत तत्वगिन्यानीक आनी धर्मशास्त्रीय अभ्यास केलो आनी 1993 ते 1996 ह्या काळांत ताणें गोंय विद्यापिठाची सेंट झेवियर कॉलेजींतल्यान ‘डिस्टिंक्शन’ घेवन  मानसशास्त्रांतली पदवी पुराय केली.

फादर आग्नेलो पिन्हेरोक 28 ऑक्टोबर 2000 दिसा पाद्रीपणाची माखणी फावो जाली आनी पयलेच खेपे ताका सेंट अलेक्स इगर्ज, कळंगूट हांगा सहाय्यक पॅरिश पाद्री म्हूण नेमलो. 2001 ते 2002 मेरेन ताणें पोरन्या गोंयच्या सेंट पायस धा ह्या पास्टोरल इन्स्टिट्यूटांतल्यान गंवळीक प्रशिक्षण पुराय केलें.  पिन्हेरो हांणी आपली शैक्षणिक कार्य सुरुच दवरले आनी 2002 ते 2004 ह्या काळांत पुणेच्या ज्ञान दीपा इन्स्टिट्यूट ऑफ फिलॉजोफी अँड थ्योलॉजींतल्यान तत्वगिन्यानांत पदव्युत्तर पदवी मेळयली. उपरांत ताणें 2013 ते 2016 ह्या काळांत रोमांतल्या पोप ग्रेगोरियन युनिव्हर्सिटींतल्यान तत्वगिन्यानांत डॉक्टरेट मेळयली. ताचो विशय आशिल्लो सांयटीफीक मेंटालिटी अँड सेक्युलारिटी इन द फिलॉजोफी ऑफ चार्ल्स टेयलर.  हो चार्ल्स टेयलर कॅनॅडाचो राजकी आनी समाजीक तत्वगिन्यानी, जो ‘ह्या संवसाराच्यान देवा विणें रावूंक जाता?’ हाचेर सोद करतालो. फादर आग्नेलान आपले कळाशेंतल्यान, आमी ह्या संवसारांत मनभंगांत सांडूंक जायना, आमच्या जिवितात देवाक जागो दिवंक जाय हें दाखोवन दिलें. 

जून 2017 वर्सा फादर आग्नेल राशोलचे पॅट्रिआर्कल सिमिनरींत तत्वगिन्यानाचो प्राध्यापक जावन परतलो. जून 2022  थावन मे 2023 ह्या काळांत ताणें साश्टींतले धर्मापूरचे सेंट जोसेफ इगर्जेचो पॅरोशियल एडमिनिस्ट्रेटर म्हणूनय काम केलें. 2018 वर्सा सावन फादर आग्नेलो पिनहेरो गोंय आनी दमणचे आर्चडायोसीजींत आंतरधर्मीय संवादाच्या अपोस्टोलेटाचो प्रभारी म्हणून काम करीत आयला. वेगवेगळ्या धर्मीक समाजां मदीं समजूत आनी एकचार वाडोवपाक केल्ल्या योगदाना खातीर ताची नामना आसा.

गोंयकारांक खोशेचो खीण

भोवमानेस्त पोप चौदावो लियोच्या भारताचो आपोस्तोलीक नुन्सिओ लेपोल्दो जिरेली हाचे वतीन गोंयचो आर्चबिशॉप फिलीप नॅरी फेरांव हाणें गोंयच्या आर्चडायोसीजींतल्या पाद्रीं मदलो रेव्ह फादर फ्रांसिस्को आंतोनियो आग्नेलो जासिंतो पिन्हेरो हाका महाराष्ट्रांतल्या सिंधुदुर्ग दियोसिजीचे नवो बिशॉप म्हूण 14 फेब्रुवारी 2026 दिसा जाहीर केलें तेन्ना गोंयकारां मदें खुशालकायेचें ल्हार पातळ्ळें. राशोल सिमिनार फुलून आयली. थंयचे पाद्री आनी सिमिनारिस्त उडणां मारूंक लागले कित्याक तो थंयचो प्राध्यापक आशिल्लो. गोंयच्या वेगवेगळ्या थरां वेल्या लोकान खोस उग्तायली. 16 एप्रील 2026 दिसा सिंधुदुर्गांत ताचो धर्मीक सोपूतविधी जातलो.

सिंधुदुर्ग डायोसीजी विशीं

सिंधुदुर्ग डायोसीज 5 जुलय 2005 दिसा पुणे डायोसीजी पासून वेगळी जावन स्थापन जाली. सुरवेक मुंबयचे आर्चडायोसीजी खाला आशिल्ली आनी 2006 वर्सा पोप सोळावो बेनेडिक्ट हाणें गोंय आनी दामांवचे डायोसीजी कडें तिचो संबंद जोडलो. रत्नागिरी आनी सिंधुदुर्ग जिल्हे आनी कोल्हापूर जिल्ह्याचे कांय वाठार हे डायोसीजिचो वाठार सुमार 21,099 चौखण किलोमीटर आसा. सावंतवाडी हें डायोसीजींतलें सगळ्यांत व्हडलें शार, जाल्यार रत्नागिरी आनी मालवण हींय म्हत्वाचीं केंद्रां. डायोसीजींत मराठी, कोंकणी, इंग्लीश हांचो उपेग जाता. कोंकणी मुखेलपणान घरांत उलयतात, जाल्यार मराठी प्रशासकीय कामां खातीर वापरतात. सुमार 200 वर्सां आदीं गोंयांतल्यान जायतीं कुटुंबां स्थलांतरीत जाल्ल्यान थंयच्या कॅथॉलीक समाजांत गोंयची घटमूट सांस्कृतीक परंपरा दिसून येता.

8 ऑक्टोबर 2024 ह्या दिसा बिशॉप अँथनी आल्वीन फर्नांडीस बारेटो हाणें राजिनामो दिल्ल्यान हे डायोसिजींत बिशॉपाचो जागो रितो जाल्लो. 43 पॅरिशी आशिल्ल्या सिंधुदुर्ग डायोसीजींतूय सद्या खोशेचें वातावरण निर्माण जालां.

नव्या बिशॉपाचो संदेश

आमी नव्या बिशॉपाक परबीं दिवंक गेले तेन्ना ताणें अशे उद्गार काडले, “आमच्या वडिलांचे इत्से प्रमाणें शिकप केलें आनी देवाचे खोशे प्रमाणें सेवा केली. ही सेवा पुराय निसुवार्थी आशिल्ली. इगर्जेंत पदव्यो नात, व्हडपण ना, एकूच वावर ‘सेवा’, सेवा जेजुच्या मोगान आनी जेजुच्या मोगा खातीर.  कसलीच अपेक्षा करिनासतना जेजुच्या मोगान आनी जेजुच्या मोगा खातीर, ताचे म्हयमे खातीर तीच सेवा सगळ्यांनी करची.” ताच्यांत आमकां खाल्तेपण दिसलें, ल्हानपण दिसलें आनी लोकांक जेजू दिवपाची योग्यताय दिसली. असलेच मनीस वैभवाक पात्र थारतात, तेच जेजुच्या रथाचेर बसतात.

सोंपयतना… 

आमच्या जिवितांत खुब तरेचे मनीस पळेले आनी अणभवले, घातकी तशेच भागीवंत. फादर आग्नेलाक ह्या बिशॉप पदाच्या हुद्यार पळोवन जीव धादोसलो. असल्या खालत्या मनशाचीं भागीं पावलां म्हज्या घरांत भितर सरलीं आनी म्हज्या चितनांक वेगळें वळण दिवन गेलीं. ताचो आशिर्वाद घेतना इतलेंच म्हणलें, ताची खाल्तीकाय म्हज्यांत येवं आनी म्हजे मुखार आशिल्ल्या चक्रव्युहांतल्यान हांव जैतीवंत जावन भायर सरूं. अशींच क्रिस्ती प्रजेक भागी करूंक बिशॉप आग्नेलो पाठ थारूं.

– विन्सी क्वाद्रूस, राय, साश्ट

मो. – 9822587498