भांगरभूंय | प्रतिनिधी
पणजी : राज्यांत ३१ मार्च २०१९ ते ३१ मार्च २०२४ ह्या पांच वर्सांच्या काळांत क्रिस्तांव धर्माच्या सरकारी कर्मचार्यांचो आंकडो २.३२ टक्क्यांनी देंवला. हाचे मजगतीं हिंदू कर्मचार्यांचो आंकडो २.१४ टक्क्यांनी जाल्यार मुस्लीम कर्मचार्यांचो आंकडो ०.०९ टक्क्यांनी वाडला. वयले तीन धर्म सोडल्यार हेर धर्मीय कर्मचार्यांचो आंकडो पांच वर्सानी ०.१२ टक्क्यांनी वाडला. सांख्यिकी खात्याच्या अहवालांतल्यान ही म्हायती मेळ्ळ्या.
ह्या अहवालांत सरकारी खातीं, स्वायत्त संस्था, अनुदानीत संस्था आनी भौशीक मळावेल्या उपक्रमांत काम करपी कर्मचार्यांचो आसपाव केल्लो. वयल्या काळांत राज्यांतल्या सरकारी कर्मचार्यांच्या आंकड्यांत १.२८ टक्क्यांनी वाड जाल्या. ३१ मार्च २०१९ निमाणे कडेन राज्यांत वट्ट ६३ हजार १६२ सरकारी कर्मचारी आशिल्ले. हातूंत ५० हजार ४३१ (७९.९४ टक्के) हिंदू धर्मीय, ११ हजार ३३६ क्रिस्तांव (१७.९४ टक्के), १,४३४ मुस्लिम (२.२७ टक्के) जाल्यार ९० कर्मचारी (०.०२ टक्के) हे हेर धर्माचे कर्मचारी आशिल्ले.
नव्या अहवाला प्रमाण ३१ मार्च २०२४ चे निमाणे कडेन राज्यांत वट्ट ६३ हजार ९७० सरकारी कर्मचारी आशिल्ले. हातूंत ५२ हजार ४४९ (८१.९८ टक्के) हिंदू, ९ हजार ९९७ क्रिस्तांव (१५.६२ टक्के), १,३७७ मुस्लीम (२.१८ टक्के) जाल्यार १८ कर्मचारी (०.१४ टक्के) हेर धर्मो आशिल्ले. शिक्षणीक पात्रते प्रमाण पळयल्यार वयल्या काळांत उच्चशिक्षीत सरकारी कर्मचार्यांच्या आंकड्यांत १.६० टक्क्यांनी वाड जाल्या. हातूंत पदव्युत्तर पद्वी वा ताचे मुखावेलें शिक्षण घेतिल्ल्या सरकारी कर्मचार्यांचो आसपाव आसा.
१४ टक्के जोडपें कर्मचारी
अहवाला प्रमाण ३१ मार्च २०२४ निमाणे कडेन वट्ट सरकारी कर्मचार्यां मदले ८९१४ (१३.९३ टक्के) हीं घोव-बायलां आसात. ३१ मार्च २०१९ चे निमाणे कडेन होच आंकडो ९७३६ (१५.४१ टक्के) आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
