भांगरभूंय | प्रतिनिधी
नातलां हें उतर कानार सादतना म्हजें दोळ्या सामकार म्हजो गांव शिरोडें उबो रावता. ते थंडेचे दीस – कुडकुड्यांचे शीं. तीं झाडांचेर लिकलिकपी नकेत्रां, गोरवां गोठो आनी कुंसवार, तीं फांतोडे वेलीं मिसां आनी मनश्यां मनश्यां मदली उमेद. उमेदीचो नवो हावेस, नवीं चिंतनां आनी नवीं सपनां. बाळक जेजू आमकां देवाची भुरगीं करूंक आयलो. पातकाच्यो सांकळ्यो तोडून, परतून देवा बापाच्या गोपांत व्हरूंक आयलो. म्हाका सदांच नातलांच्या दिसा क्रिसमस ट्री सजोवपाक खूब आवडटाली. तिका नटयतना वेगळीच उमेद आनी खोस आमच्या इश्टांच्या मुखामळार उदेंताली.
नातलांच्या उत्सवा खातीर नातलांचें झाड खाशेलें कित्याक आसता काय? हाचें फाटलें मूळ कारण सोदूंक लागलों. क्रिस्तांव लोकां खातीर नातलां हो वर्साचो एक म्हत्वाचो सण अशें मानतात. ह्या दिसाच सांता क्लॉज सारकी आनीक एक म्हत्वाची गजाल आसा, ती म्हळ्यार नातलांचें झाड. ह्या नातलां झाडाक सजोवपा खातीर भुरग्यां सावन व्हडल्या मेरेन खाशेलो उत्साह भरिल्लो आसता. भुरगीं ह्या झाडा कडेन खूब आकर्शीत जातात. म्हणटकच तांच्या आग्रहाक लागून जायते जाण घरांत एक बरें नातलाचें झाड सजयतात.
दर वर्सा ह्या नातलांच्या झाडाचेर वेगळें कितेंय करचें असो प्रस्न जायत्या आमच्या क्रिस्तांव भाव-भयणीक पडटा. इतलें आसून लेगीत नातलांक हें झाड इतलें म्हत्वाचें कित्याक आसता. हाचें कारण कांय आयच्या तरणाट्यांक खबर ना. ह्या नातलांच्या झाडाचेर नदर मारल्यार पयलो प्रस्न मनांत येता, तो म्हणल्यार हीं झाडां नेमकी खंयचीं? खंय सावन आयलीं ? कांय लोक ह्या झाडाक ‘पानझडी झाड’अशें म्हणटात हो पॅगन संस्कृतायेच्या झाड पुजेचो एक भाग मानतात. ताचो संबंद शिंयाळाच्या संक्रमणा कडेन आसता. नाताल झाड हें नांव पयलेंच खेपे 1835 वर्सा मुखार आयलें . देखून झाडांक दिवली आनी हेर सजावटीचें साहित्यांचे हार घालून सजयतात. चड करून ह्या झाडाचेर भुरग्यांचे मोजे, ल्हान घांटी, भेटवस्तू आदींनी सजयतात. मागीर प्रस्न पडटा तो असो, नातलांच्या झाडाची परंपरा कशी उदेंली तर?
इतिहासकाराच्या मतान, – नातलां झाडांची परंपरा जर्मनांनी सुरू केल्लीं अशेंय मानतात. 16 व्या शेंकड्यांतलो सांत मार्टीन ल्यूथर हो आपल्या घरांत नातलांचें झाड सजोवपी पयलो मनीस आशिल्लो. पयलींच्या काळांत ओकच्या झाडांक नातालांचें झाड म्हूण सजयताले. पूण काळाच्या रुपांत नातलांच्या झाडाचें स्वरुप बदललें दिसलें. आतां नातलांचें झाड प्लास्टिक आनी विंगड-विंगड रुपांनी वाडलां. तर नातलांचें झाड सजोवपाचें मुळांवें कारण हें अशें आशिल्लें. हें सांगपाचो मुळावो हेतू म्हळ्यार आमकां आनी आमचे फुडले पिळेगेक एक खास उत्सव खास करून कित्याक मनयतात. ताचे विशीं जाण आसूंक फावो.
समेस्तांक क्रिस्ती जयंती ही खरेंच उजवाडाची, संतोसाची आनी मोगाची परब जावं. इतलेंच प्रभूचे सरीं मागणें…
विशाल सिनाय खांडेपारकार
8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
