भांगरभूंय | प्रतिनिधी
पणजी ः हैदराबादांतल्या गुंतवणुकदारांक सुमार 2 कोटी रुपयांची तोपी घाल्ल्या प्रकरणांत हैदराबाद केंद्रीय गुन्यांव फांट्याच्या विशेश विभागान गुन्यांव नोंद केलां. ह्या प्रकरणांत दाबोळे विमानतळ पुलिसांनी क्रिप्टोकरन्सी प्लॅटफॉर्म कॉयन झेडएक्स (COINZX) चो वेवस्थापकीय संचालक रवी महासेठ हाका अटक केल्या. वास्कोच्या पयल्या वर्ग न्यायालयान ताका सशर्त अंतरीम ट्रान्झिट जामीन मेजूर केलां.
ह्या प्रकरणांत हैदराबादच्या गोशामहालांतल्या जितेंद्र नांवाच्या मनशान 11 फेब्रुवारीक हैदराबाद केंद्रीय गुन्यांव फांट्याच्या विशेश फांट्यांत कागाळ केल्ली. ते प्रमाण, कागाळदाराक चड पयशे दिवपाचें हांयस दाखोवन रमेश पुरी नांवाच्या मनशान क्रिप्टोकरन्सी प्लॅटफॉर्माचेर 1.2 लाख रुपया गुंतवपाक सांगलें. ते प्रमाण ताका 22 म्हयन्यां खातीर दर म्हयन्याक 11 हजार रुपया परतावो मेळटलो अशें उतर दिल्लें. ते प्रमाण कागाळदारान 1.2 लाख रुपया गुंतवणूक केली. कागाळदारान आपल्या सोयऱ्यांक आनी इश्टांक तातूंत गुंतवणूक करपाक लायली. कागाळदार सयत सुमार 100 जाणांनी मेळून वट्ट 2 कोटी रुपयांची गुंतवणूक केली. कागाळदाराक सुरवेक पयल्या चार म्हयन्यांत थारायिल्ले प्रमाण परतावो दिलो. ते उपरांत तो बंद जालो आनी ताची फटवणूक जालां हें कळटकच ताणें कागाळ केली.
हाची दखल घेवन हैदराबाद केंद्रीय गुन्यांव फांट्याच्या खाशेल्या विभागान क्रिप्टोकरन्सी प्लॅटफॉर्म कॉयन झेडएक्साचे वेवस्थापकीय संचालक रवी महासेठ हाचे सयत ताचो वांगडी रमेश पुरी आनी हेरां आड भादंसंच्या कलम 406, 420 आनी 120 बी खाला गुन्यांव नोंद केलो. मजगतीं, रवि महासेठ 12 ते 14 ह्या काळांत गोंयांत नव्या प्लॅटफॉर्माचें अनावरण करतले अशी म्हायती विभागाक मेळ्ळी. ते प्रमाण विभागान महासेठा आड लुकआउट सर्कुलर जारी केलें.
मजगतीं, 13 तारखेक मध्यान रातीं 1 वरांचेर रवी महासेठाक दाबोळे विमानतळार पावतकच ताब्यांत घेतलो आनी दाबोळे विमानतळ पुलिसांच्या ताब्यांत दिलो. दाबोळे विमानतळ पुलिसांनी महासेठाक फातोडेर अटक करून सकाळीं 4 वरांचेर जिल्लो दंडाधिकाऱ्या मुखार हजर केलो. मागीर हैदराबाद पुलिसांनी 13 तारखेक दनपारां 1.30 वरांचेर अटक करून वास्को न्यायदंडाधिकाऱ्यां मुखार हजर केलो. मजगतीं, अॅड. गौरेश अग्नी हांणी महासेठा वतीन न्यायालयांत ट्रान्झिट जामीना खातीर अर्ज केलो.
ट्रान्झिट जामीन मंजूर
दुबावीत महासेठ हाका कसलीच नोटीस दिवंक नासतना आनी गरजेची कायदेशीर प्रक्रिया पाळनासतना अटक केल्ल्याचो दावो तांणी केलो. देखून ताका हैदराबादच्या संबंदीत न्यायालयांत वचून जामीन अर्ज दाखल करपा खातीर ट्रान्झिट जामीन मंजूर करपाची मागणी करपाक सांगलें. हाची दखल घेवन न्यायालयान रवी हाका 20 हजार रुपयांची अट घालून आनी 20 तारखेक थंयच्या न्यायालयांत जामीन अर्ज दाखल करपाक परवानगी दिवन ट्रान्झिट जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
