भांगरभूंय | प्रतिनिधी
पणजीः गोंय क्रिकेट संघटणा (जीसीए) जर क्रिकेट स्टेडीयम दिवचल लागसारच्या मांवळिंगें गांवांत व्हरपाक सोदता जाल्यार सरकार पुराय सहकार्य करतलें. धारगळेची सुवात वापरा बगर पडून आशिल्ल्यान सरकारान जीसीएक कारणां दाखया नोटीस काडल्या. जर जीसीए धारगळे जमनी विशीं गंभीर ना जाल्यार सरकार ती जमीन परत घेतलें अशें मुख्यमंत्री डॉ. प्रमोद सावंत हांणी सांगलें.
७ वर्सां मायज जालीं धारगळे जीसीएक दिल्ले जमीनीचेर क्रिकेट स्टेडीयमा खातीर बुनयादी फातर केन्ना बसयतले असो प्रस्न पेडणेंचे आमदार प्रवीण आर्लेकार हांणी सभाघरांत विचारिल्लो.
ह्या प्रस्नाचेर जाप दितना मुख्यमंत्र्यान सांगलें, गोंय क्रिकेट संघटणेक धारगळे १.८९ लाख चौखण मीटर सुवात क्रिकेट स्टेडीयमा खातीर लीजार दिल्ली. पूण ती वापरा बगर पडून आशिल्ल्यान सरकारान जीसीएक २८ मे २०२४ दिसा कारणां दाखया नोटीस काडल्या. हे जमनीचो अजून मेरेन कसलोच वापर जावंक ना देखून सरकारान ही जमीन परत कित्याक घेवची न्ही अशी शिटकावणी आमी नोटीसींत दिल्या. १९ कोटी लीज रक्कम मदली ९ कोटी जीसीएन भरल्या, अशी म्हायती मुख्यमंत्र्यान दिली.
जर धारगळे क्रिकेट स्टेडीयम शक्य ना जाल्यार हो क्रिकेट स्टेडीयम म्हावळींगे- दिवचले व्हरचो अशी मागणी मयेंचे आमदार प्रमेन्द्र शेट हांणी केली. हाचेर जाप दितना मुख्यमंत्र्यान सांगलें, स्टेडीयम खंय घालप हो निर्णय जीसीएचो जावन आसा. म्हावळींगें- दिवचल जीसीएची स्वताची जमीन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
