भांगरभूंय | प्रतिनिधी
फाटलीं बरींच वर्सां हुमकळत उरिल्ल्या क्रिकेट स्टेडियमाचो प्रस्न आतां परतून उफेला. जीसीए कडल्यान धारगळे स्टेडियम बांदपा खातीर गरजेचे परवाने तयार करपाचें काम चलता. चडश्या क्लबांनीय हांगा स्टेडियम बांदपाक मान्यताय दिल्या, अशें गोंय क्रिकेट असोसिएशनाचे (जीसीए) अध्यक्ष विपूल फडके हांणी पयर सांगलें. ताचे आदले दीस स्टेडियम वन- मावळिंग्यां बांदपाचे यत्न सुरू केल्यात, अशी घोशणा खेळां मंत्री गोविंद गावडे हांणी दिवचले एके कार्यावळींत केली. हाचे आदीं कुडचिऱ्यां, करासवाडो- आंब्यांनी आंतरराष्ट्रीय दर्जाचो क्रिकेट स्टेडियम जातलो अशें आयकूंक येतालें. ते विशीं दिसाळ्यांनी खबरो, लेख, अग्रलेख पसून आयल्यात. मात तांकां केन्ना म्हूर्त मेळूंक ना. फाटल्या कांय म्हयन्यां सावन धारगळ, वन- मावळींगें हिंवूय नांवां आयकूंक येतालीं. पूण काम मुखार वचनाशिल्लें. निदान आतां जापसालदार व्यक्तींनी हे विशीं सांगलां, म्हणटकच क्रिकेट स्टेडियमाक गती मेळची. बीसीसीआयचे समितीचेर गोंयच्या रोहन देसाय हांची निवड जाल्या. ताका लागून स्टेडियमाचें काम बेगीन जाग्यार पडटलें, अशी राज्यांतल्या क्रिकेटमोगींक आस्त आसा.
गोंयांत सध्या नांव घेवपा सारको व्हडलो स्टेडियम आसा, तो फातोड्ड्यां. पं. जवाहरलाल नेहरू स्टेडियम. पूण थंय फुटबाॅलाक चड प्राधान्य मेळटा. हाचे आदीं थंय भारतीय पंगडाच्यो आंतरराष्ट्रीय क्रिकेट मॅची जाल्यात. वट्ट णव मॅची ह्या मैदानाचेर खेळयल्यात. 2007 वर्सा निमाणी मॅच जाल्ली. लुसोफोनिया, राष्ट्रीय खेळां सर्त जाल्या. एफसी गोवाचें तर तें घरचें मैदान म्हणपाक हरकत ना. ह्याच मैदानाचेर एका काळार गाजिल्ली ‘क्रिकेट तिकेट भानगड’ जाल्ली. हांगा क्रिकेट मॅची खेळोवपाक फुटबाॅल समर्थकांचो भितरल्यान विरोध आसता. फुटबाॅलाक लागून क्रिकेटीची पिचूय इबाडटा. देखून राज्यांत एकतरी सुसज्ज म्हणटात तसो क्रिकेट स्टेडियम जायच…. आनी तो कायम व्यस्त उरपाक जाय. म्हणल्यार तो धवो हती जावंक उपकारना. पर्यटनाचे नदरेनूय ह्या मैदानाचो खूब फायदो जातलो. हांगा क्रिकेटीच्यो हेर सर्तीय खेळोवपाक मेळटल्यो.
गोंयांत कांय शाळा सोडल्यार पाचवीचार मैदानां तशीं उणींच. तरीय उमेदी भुरगे शेंकऱ्याचे (बारीक गुंडे) जमनीर, शेतांनी खेळून आपली उमेद भागयतात. फुटबाॅल, क्रिकेट खेळपाक कांय क्लबांचीं मैदानां आसात, पूण ताचो लाव हेर पंगडांक मेळटाच अशें ना. प्रत्येक गांवांत नवें देवूळ, सभामंडप जाल्यात, तशीं मैदानांय जावंक जाय. शक्य आसल्यार सरकाराचे मजतीन ल्हानसो स्टेडियमूय बांदू येता. लुकसाण जावचें ना, केन्ना तरी फायदोच जातलो. फक्त मैदान न्हय, तर इनडोअर स्टेडियम, व्यायामशाळाय जाय. म्हणटकच नव्या खेळगड्यांक करियराचे नदरेन खेळाक सर्मपीत जावंक मेळटलें. दिलीप सरदेसाय सोडल्यार भारतीय क्रिकेट पंगडांत सातत्यान दुसरो गोंयकार खेळूंक ना. मदीं पारस म्हांबरे खेळिल्लो तितलोच. हाॅकी, फुटबाॅलाच्या राष्ट्रीय पंगडांत गोंय मुक्ती पयलीं साबार गोंयकार खेळ्ळ्यात. म्हणटकच इतल्या राज्यांतल्या खेळगड्यां मुखार आमकां कोण विचारता? हो न्यूनगंड गोंयकारांनी बाळगुचो न्हय. आयचे घटकेक पसून राष्ट्रीय पांवड्याचेर नांव करतले, अशे गोंयकार क्रिकेट खेळगडे आसात. आयपीएलांत ते दिसल्यात. अमेरिकेच्या आंतरराष्ट्रीय पंगडांतूय मूळ गोंयकार खेळगडो दिसला. म्हणटकच चडांत चड भुरग्यांनी मुखार सरपाक जाय. मात ते खातीर तांकां सगल्यांत पयलीं मैदान जाय. तांच्या गांवांनी पाचवीचार आशिल्लें वा मातयेचें तरी मैदान मेळत जाल्यार तांच्या मनांत हावेसाची आंकरी फुट्टली. जाणकार प्रशिक्षक जाय. खेळाचें सामान (कीट) जाय.
आंतरराष्ट्रीय दर्जाचो स्टेडियम उबारतलो जाल्यार आशिकुशीक हाॅटेलां, विमानतळ, रेल्वे स्टेशन, बसस्टॅण्ड आसचो पडटा. रुंद रस्तेय गरजेचे. पार्किंगेची वेवस्था जाय. थळाव्या लोकांक मनस्ताप जावचो ना. येरादारीची कोंयडी जावची ना, हेंवूय पळोवचें पडटलें. जीसीए अध्यक्षाच्या मतान, धारगळे स्टेडियम जावप बरें. कारण थंय खूब हाॅटेलां येवपाचीं आसात. आंतरराष्ट्रीय विमानतळ लागीं आसा. पर्वरेचो उड्डाण पूल तयार जातलो. ताका लागून येरादारीची कोंयडी जावची ना आनी पणजेच्यान धारगळे मेरेन बेगीन पावतले. मात, जीसीए कडेन जोडिल्ल्या क्लबांचो निर्णय म्हत्वाचो. तशें ताचे परस म्हत्वाचें सरकाराचें मत. तरीय धारगळे हो भोवतेकांच्या मतान बरो जागो. वन- मावळिंग्या स्टेडियम बांदपाक कांय वर्सां पयलीं 40 कोटी रुपया खर्च करून जागो घेतिल्लो. हांगाच स्टेडियम जावचो, हे खातीर आपूण यत्न करतां, अशें खेळां मंत्री गावडे हांणी सांगलां. तो खंयूय जावं, पूण गोंयांत फातोड्डे परस व्हडलो, निदान 30 हजार प्रेक्षक बसतले, टीव्ही वयल्यान प्रक्षेपण करपाच्यो आंतरराष्ट्रीय पांवड्याच्यो सुविधा आसतल्यो, असो स्टेडियम गोंयांत जावप ही काळाची गरज. खेळां खात्या सयत हेर सरकारी खातीं, थळावी पंचायत, जीसीए, खेळां संघटणा हांणी आतां पेंगट बांदून वावराक लागचेंच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
