भांगरभूंय | प्रतिनिधी
मुंबय, खबरां संस्था: नामनेचे क्रिकेट समीक्षक, लेखक द्वारकानाथ संझगिरी (७४) आयज संवसाराक अंतरले. संझगिरी हांणी मुंबयच्या लीलावती हॉस्पिटलांत निमाणो स्वास घेतलो. सिव्हिल इंजिनीयर आशिल्ले संझगिरी मुंबय महापालिकेंत उच्च पदार काम करताले. मात क्रिकेटीचेर बरोवप, उलोवप हाका लागून ते कांय काळा भितर नामनेचे क्रिकेट समीक्षक जाले. क्रिकेट रसिकांनी तांच्या क्रिकेटीवेल्या लेखांक आनी हेर लेखांकूय बरीच पसंती दिली. विनोदी, खुसखुशीत शैलींत ते लिखाण करताले.
संझगिरी हांणी एकाच वेळार दोन मळांचेर काम केलें, तांणी मुंबय महानगरपालिकेंत अभियंतो म्हणून नोकरी केली. थंयच्यान ते २००८ वर्सा मुख्य अभियंतो म्हणून सेवानिवृत्त जाले. वांगडा तांणी स्तंभलेखक, लेखक आनी सुत्रसंचालक म्हणूनय आपली एक वेगळी वळख निर्माण केली. १९७० वर्सा लेखन कारकीर्द सुरू करून तांच्या सुरुवातेच्या काळांत तांणी ‘दिनांक’ आनी ‘श्री’ ह्या मासिकांनी नेमान साहित्य योगदान दिलें. भारतान इंग्लंडांत १९८३ चें वर्ल्डकप जिखले उपरांत, तांणी हेर कांय इश्टां वांगडा ‘एकच षटकार’ हें खेळां पाक्षिक काडलें. जातूंत द्वारकानाथ संझगिरी हांणी कार्यकारी संपादक म्हणून काम केलें. संदीप पाटील ताचे कांय काळ संपादक आशिल्ले.
४० पुस्तकां प्रकाशीत
द्वारकानाथ संझगिरी हांणी १९८३ सावन ते आज मेरेन सगले एका दिसाचे आंतरराष्ट्रीय क्रिकेट वर्ल्ड कप कव्हर केल्यात. स्तंभलेखना वांगडा संझगिरी हांणी प्रवास, सामाजीक समस्या, खेळ आनी चित्रपट अशा विविध विशयांचेर ४० पुस्तकां बरयल्यांत. सुनील गावस्कार, सचिन तेंडुलकार आनी मुंबयच्या भोवतेक क्रिकेट खेळगड्यां कडेन तांचे लागींचे संबंद आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
