क्रिकेट विश्वकप हारींतल्यान घेवपाची देख

भांगरभूंय | प्रतिनिधी

ह्या क्रिकेट विश्वकप सर्तींत साखळींतले सेगीत सगळे धा सामने दिमाखान जिखपी आमचो भारतीय क्रिकेट संघ हो आयज जगांतलो सर्वश्रेश्ठ संघ जावन आसा हाचे विशीं खंयच्याय देशाच्या क्रिकेट मोगीच्या मनांत दुबाव आसचो ना. मात तांकां आमच्याच देशाच्या ‘भाईयो, बहनो आनी मित्रों’नी अंतीम मॅचींत जिखपा खातीर आकांताचो दबाव हाडून हारयले. टीम इंडियाचो फॉर्म पळयत जाल्यार ती मॅच भारता भायर जगांत – पाकिस्तान धरून – खंयच्याय देशांत खेळिल्ली जाल्यार सर्त जिखपाची अशें आतां दिसपाक लागलां.
देशाच्या संघाक आपल्या देशांत खेळटा तेन्ना घराच्या प्रेक्षकांचें बळगें मेळटा हो फायद्याचो भाग आसलो तरी तो तेंको करंदायेच्या रुपान प्रमाणा भायर वाडलो जाल्यार खेळागड्यांची एकाग्रता भंग जाता, तांच्या हातांतल्यान चुकी घडपाक लागतात हेंच पयरच्या सामन्यांत दिसलें. अती थंय माती म्हणटात तें हें. रोहीत शर्मान बरी सुरवात केल्ली, पूण ताच्या प्रत्येक शॉटाच्या प्रतिसादांत हिसपा भायर गजर घालो तातूंत तो भारावन व्हांवत गेलो आनी गरज नासतना चुकीचो फटको मारून बसलो आनी थंयच्यान भारताच्या खेळाक उतरती कळा लागून मॅच घाणायली.
“स्टॅडियमांत एक लाख तीस हजार चाहते भारताच्या बाजून एकतर्फा बळगें दीत आड्डताले हें आमी जाणात, तेन्ना तांचो आवाज बंद करप हीच आमची रणनिती आसतली” अशे तांचो मुखेली पॅट क्युमिन्स हाणें आदल्या दिसा मुलाखतींत म्हणिल्लें तें खरें करून दाखयलें. भारतीय चाहत्यांचो भार देंवयले उपरांत ऑस्ट्रेलियान आपल्या रणनिती नुसार शांतपणान मोख गांठली. “एकट्या खातीर सगळे आनी सगळ्यां खातीर एकटो” हे अलेक्झांड्र ड्युमा हांच्या ‘थ्री मस्केटीयर्स’ कांदबरेंतल्या प्रमुख नायकांचें ब्रीदवाक्य क्रिकेट सांघीक भावनेक लागू पडटा. शमी, कोहली हांणी कर्तूब दाखयत वैयक्तीक कारनामे केले खरे, पूण रणनिती खाला संघभावनेन खेळून जैतीवंत जावन ऑस्ट्रेलिया मात सवे फावट विश्वकप उबारून घेवन गेलो. आमच्या देशांत चाहत्यांनी घालो तसो खवदोळ आपल्या संघा खातीर ऑस्ट्रेलियन चाहत्यांनी तांच्या देशांत केल्लो दिसलो ना. सेगीत धा सामने जिखले उपरांत जणू काय अंतिम सामनो बोल्सांत पडलो ह्या फाजील आत्मविश्वासान आमचो घात घेतलो.
ऑस्ट्रेलियाच्या कप्तानान प्रत्येक फलंदाजाच्या बॅटींग स्टायली नुसार ताका तोडीची बॉलिंग लायिल्ली. शमी आनी बुमराहाक ह्या टॉपच्या बॉलरांक वापरपाचे बाबतींत आमचो कप्तान मातसो गोंदळिल्लो दिसलो. रणनितीचो, गृहपाठाचो उणाव सामन्यांत जाणवलो. बरें खेळ्ळें ना हें कप्तानान मान्य केलां.
खेळ हो सदांच खेळभावनेन खेळपाक जाय. आपल्या देशाच्या संघा बद्दल देशवासियांनी अभिमान बाळगप योग्य, पूण प्रतिस्पर्ध्यांक दुस्मान लेखप समा न्हय. बरें खेळ्ळें जाल्यार तांचेंय व्हड काळजान अभिनंदन करप हे खेळभावनेचो हे सर्तीच्या दरम्यान उणाव दिसलो. शिवाय खेळांमळार राजकारण, देशप्रेम, धर्म हाडूंक फावना.
पयले म्हणल्यार मिडिया – छापी तशीच दृकश्राव्य- पक्षपाती दिसली. भारत फायनल हारलो तेन्ना ‘जिखप- हारप हो खेळाचो भाग जावन आसता’ अशें तत्वगिन्यान सांगपी मिडियान श्रीलंका हारली तेन्ना मात ‘लंकादहन’ केलें अशी सामक्या हलक्या श्रेणीची भाशा वापरली. फायनलींत ऑस्ट्रेलिया हारिल्ली जाल्यार ‘भारतीय शेरोने कांगारूं का शिकार किया’, ‘ऑस्ट्रेलिया से हिसाब चुकता’ सारकिले माथाळे, हॅशटॅग दिसपाचे. सर्त चालू आसतना फकत आपल्याच खेळगड्यांची तितलीच तोखणाय करप हें यजमान देशाची मिडिया, नागरिकांक सोबून दिसना.
फायनली दिसा स्टुडियोंत चॅनल लायव्ह कवरेज करपाक बशिल्ले तेन्ना फाटल्या पड्ड्यार भारताचो ध्वज, विराट, शमी आनी रोहित दिसताले. ऑस्ट्रेलियाच्या एकाय गड्याचें चित्र नाशिल्लें. ऑस्ट्रेलिया मॅच हारतली हें गृहीत धरून फकत भारत ही मॅच कशी आनी कितल्या फरकान जिखतलो हाचेर भासाभास चलताली. ऑस्ट्रेलियन खेळगडे, तांची संभावीत रणनिती हाचेर कोणूच उलयलो ना. भारताच्या खेळाक उतरती कळा लागली तेन्ना एका चॅनलान कार्यक्रम कवळ्ळो आनी दोळ्यांच्या दुयेंसांचेर उपाय येवजणेची डॉक्युमॅण्टरी सुरू केली. ही खेळभावना न्हय.
भारत जिखिल्ले जाल्यार तो खीण, भारतीय खेळगडे प्रेक्षकांचें अभिवादन स्विकारत मैदानांत फेरी मारतात तें आनी मैदानांत उदास जावन दुकां शेवटींत बशिल्ले ऑस्ट्रेलियाचे खेळगडे आमचे चॅनल व्हड उमेदीन दाखयता आशिल्ले. उरफाटे जाल्ल्यान सामन्याचो शेवटाचो भाग स्पोर्ट्स चॅनल सोडून बाकीच्या खंयच्याय चॅनलांनी सारको दाखयलो ना.
धर्म ही वैयक्तीक बाब. देशाच्या जैता खातीर यज्ञ करपी श्रद्धाळुंनी ते घराच्या चार वणटींत करपाक हरकत ना. चंद्रार यान धाडपी भारत हो शास्त्रीय मानसीकता आशिल्लो देश म्हूण आमी जगांत मिरयतात, तेन्ना विश्व कप जिखपा खातीर देशभर चलयिल्ले सार्वजनीक यज्ञ टीव्हीर दाखोवन आमी आमचीच लज काडली. क्रिकेट जर्सी, पॅण्ट चडोवन यज्ञाची यजमानकी सनातन हिंदू धर्मांतल्या यज्ञविधींत बसना.
आपल्या देशाची टीम जिखपाक जाय ही देशभिमानाची भावन आसची, पूण खेळभावनेंत राष्ट्रवादाचो गंध नासचो. देशद्रोही म्हूण ब्रॅण्डेड जावपाच्या भंयान ऑस्ट्रेलियेकूय जिखपाची संद अशें मत उक्तावपी एकलोय मिडिया मुखार आयलो ना वा आयिल्लो जाल्यार देशभक्त मिडियाक तें दाखोवन ‘देशद्रोही’ जावपाचो धोको पत्करलो ना अशे दिसता. बहुसंख्य धर्मप्रेमी, राष्ट्रवादी चॅनल आयज निश्पक्षपातीपणान खेळ कव्हर करपाचे लायकीचे उरले नात.
ह्या वेळार अंतीम सामन्याचो राजकी इवॅण्ट जावन पडलो. नरेंद्र मोदी स्टेडियमांत (आदलें नांव सरदार पटेल) खुद्द नरेंद्र मोदींचे उपस्थितींत अंतिम सामनो पळयतना रोमांतल्या कॉलेशियमांत रोमन सिझरा मुखार प्रस्तूत जातालीं त्या व्दंदांच्या रोमांचाची याद जाली. भारत जिखिल्लो जाल्यार वेंचणुकेच्या मोसमांत मोदी, सत्तापक्षान ताचें स्रय उबारपाचो यत्न जावपाचो. प्रधानमंत्री, गृहमंत्री, राज्याचे मुख्यमंत्री, सरकारी खात्याचे बाबू ल्हान-व्हड राजकारणी, कार्यकर्ते हांणी थंय घिट्टी केल्ली आनी त्या बोवाळांत 1983 आनी 2011 विश्वकप जिखपी टीमींचे मुखेली कपील देव आनी महेंद्र सिंग धोनीक आमंत्रण दिवपाक एक तर विसरले आसुंये वा प्रसिद्धी झोत तांचे वांगडा साझी करप टाळपा खातीर तांकां जाणा जावन आपोवणें धाडलें नासतलें. दुसरी शक्यताय चड दिसता.
विद्यार्थी परिक्षा पेपर बरयता आसतना जर शाळेचो मुख्याध्यापक ताचे बाजूक बसून तो कितें, कशें बरयता तें पळयत रावलो जाल्यार स्कॉलर विद्यार्थीय नेर्वोस जावन आपले क्षमते अनुरूप कामगिरी करपाक शकचो ना, हें आतां मोदी हांणी समजून घेवपाक जाय. जगांत हेर राष्ट्रांतले मुखेली, मंत्री, राजकारणी खेळांमळार लोळनात, शिवाय थंय खेळ बोर्डांचे, संस्थाचे अध्यक्ष, वांगडी जावपाचो मान निवृत्त खेळगड्यांक मेळटा, पूण भारतांत खेळाचो गंध नाशिल्ले राजकारणी आनी तांचे सोयरे तीं पदां भुशयतात हें आमच्या खेळांमळा वयलें दुर्दैव!

दीपक लाड
पर्वरी