भांगरभूंय | प्रतिनिधी
नवी दिल्ली, खबरां संस्था ः टीम इंडियाचो ओपनर बॅट्समन आनी 2013 वर्साच्या चॅम्पियन्स ट्रॉफी जिखपी पंगडांत आशिल्लो शिखर धवन हाणें क्रिकेटीच्या सगळ्या फॉर्मेटांतल्यान निवृत्त जाल्ल्याची घोशणा केल्या. धवनान 24 ऑगस्टाक सकाळीं एक्सचेर व्हिडियो शेअर करुन हे विशीं म्हायती दिली. हो व्हिडियो पोस्ट करतना शिखर धवनान कॅप्शनांत बरयलां, ‘हांव आतां म्हज्या क्रिकेट प्रवासांतलो हो अध्याय सोंपयता. हांव वांगडा खूब यादीं व्हरता. तुमच्या सगळ्या मोगा खातीर आनी केल्ले आदारा खातीर उपकार! जय हिंद!’
संवसारीक क्रिकेटांतल्या येसस्वी ओपनर बॅट्समनां मदीं शिखर धवन हाचो आस्पाव जाता. 2022 वर्सा बांगलादेशाचे भोंवडेंत वनडे मालिकेंत तो भारतीय पंगडा वतीन निमाणो खेळिल्लो.
शिखरान 2010 वर्सा पदार्पण केलें…
शिखरान 2010 वर्सा ऑस्ट्रेलिये आड जाल्ल्या वन डे मॅचींत आंतरराष्ट्रीय क्रिकेटांत पदार्पण केल्लें. 2011 वर्सा श्रीलंके आड टी-20 क्रिकेटांत पदार्पण केल्लें. ताका 2013 वर्सा कसोटी सर्तींत आंतरराष्ट्रीय मॅची खेळपाची संद मेळ्ळी. शिखरान आतां मेरेन खेळिल्ल्या 34 कसोटींत 40.61 सरासरीन 2315 धांवड्यो केल्यात. जाल्यार 167 वन डे मॅचींनी 44.11 सरासरीन 7436 धांवड्यो केल्यो. तेच वेळार ताणें टी-20 च्या 68 मॅचींनी 27.92 सरासरीन 1759 धांवड्यो केल्यो.
हाचे भायर धवनान 17 शेंकडे आनी 39 अर्धशेंकड्यां सयत वन डे मॅचींनी 44.11 सरासरीन 6793 धांवड्यो केल्यो. धवनान टी-20 आंतरराष्ट्रीय मॅचींत 11 अर्धशतकां सयत 27.92 सरासरीन 1759 धांवड्यो केल्यात. धवन देशी क्रिकेटांतल्यान निवृत्त जाल्ल्यान आतां आयपीएलांत खेळटाना दिसचो ना. आयपीएलांतल्या व्हडल्या खेळगड्यां मदीं ताचें नांव आसा. धवनान 222 मॅचींनी 35.07 सरासरीन 6768 धांवड्यो केल्यात जातूंत ताच्या नांवार 2 शेंकडे आनी 51 अर्ध शेंकडे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
