भांगरभूंय | प्रतिनिधी
मुंबय, खबरां संस्था ः आंतरराश्ट्रीय ऑलिंपिक समितीन क्रिकेट खेळांचो ऑलिंपिकांत आस्पाव करपाचो निर्णय घेतला. आयओसीची 141 वी बसका आयज मुंबयंत जाली तेन्ना आयओसीन ऑलिंपिकांत क्रिकेट खेळांचो आस्पाव करपाची घोशणा केल्या. देखून 2028 वर्सा लॉस एंजलिसात आयोजीत केल्ल्या ऑलिंपिक खेळांत टी-20 क्रिकेट मॅची खेळटले. आयओसीच्या ह्या निर्णयाक लागून 128 वर्सां उपरांत क्रिकेट ऑलिंपिकांत परतून आयल्या.
क्रिकेट, सॉफ्टबॉल, स्क्वॉश, लॅक्रॉस आनी फ्लॅग फुटबॉल ह्या पांच खेळांचो आस्पाव ऑलिंपिकांत जाता अशें ऑलिंपिक समितीन सांगलां.
ऑलिंपिकांत क्रिकेटाचो आस्पाव करपा विशीं फाटल्या वर्सा लॉस एंजलिस एकवटीत समितींत चर्चा जाल्ली. संयोजन समितीन ताका तेंको दिल्लो. अमेरिकेंत क्रिकेट खेळाची उदरगत जाय तशी अजून जावंक ना. पूण भारतीयांनी त्या देशांत हो खेळ लोकप्रिय केलो. अंदूं पयलेच खेपे त्या देशांत आयपीएल सारकी फ्रँचायझी केंद्रीत क्रिकेट सर्त जाली. हाचे भायर अमेरिकेक फुडल्या वर्सा जावपी टी-20 विश्वचषकाचें सह-यजमानपदय मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
