भांगरभूंय | प्रतिनिधी
नारी शक्तीचो दिश्टावो पुराय संवसाराक पयर आयतारा जालो. भोवतेक सगल्या जाण्ट्या क्रिकेट मोगींक 1983 ची प्रुडेंन्शियल करंड सर्त याद जाल्या आसतली. त्या वेळार आमी वेस्ट इंडिजाक हारयिल्ले. ताचे पयलीं आमच्या भारताक दरेके मॅचींत हार खावची पडटाली. वेस्ट इंडीज पंगडूच जिखतलो, अशें सगल्यांकूच दिसतालें. मात खेळांत कितें जायत तें सांगपाक येना. कालचे बायलांचे एका दिसाचे क्रिकेट सर्तींतूय तशेंच घडलें. आॅस्ट्रेलिया सारको पेझाद वस्ताद आसतना भारत निमाणें फेरयेंत पावतलो, अशें कोणाक दिसूंक नाशिल्लें. पूण बायलांनी अचकीत वयर उडणां घेत तेंगशेर पावल दवरलें. आमची ही इतिहासीक कामगिरी. कपील देवाच्या जैता उपरांत भारतांत क्रिकेटीच्या मळाचेर क्रांती जाल्ली. तशीच आतां हरमनप्रीत कौराच्या जैता उपरांत जावची. बायलां क्रिकेटीचो हुंवार देशाच्या खांची- कोनशांनी येवचो. ही व्हडली जापसालदारकी हायस्कुलां, काॅलेजी आनी क्रिकेट संघटणांच्या भुजांचेर पडल्या. तांणी आतां सावनूच कामाक लागचें.
गोंयांतल्यान शिखा पांडे सोडल्यार नांव घेवपा सारकी कामगिरी करपी दुसरी गोंयकार खेळगडी ना. मात फुडल्या काळांत तशें जावचें न्हय. बायलांचे क्रिकेट सर्तींक हालीं मेरेन खेळां मोगींची गर्दी जायनाशिल्ली. आयपीएल सुरू जाली. तिकाय प्रेक्षकांचो प्रतिसाद मेळूंक ना. खंयच्याय खेळगड्याक प्रेक्षकांची उर्बा, तोखणाय जायच पडटा. तांचो तेंको ना जाल्यार खेळगड्यांचो खेळ फुलना. हें प्रेक्षकांनी विसरचें न्हय. बायलां क्रिकेटींत दादल्यांच्या खेळांत आसता तसो वेग, फिशालकाय, जोश आसना अशें कांय जाणांचें मत. आंगांत शक्त नाशिल्लीं, हायस्कुलांतलीं ल्हान भुरगीं कशीं तरी खेळचीं तसो बायलां क्रिकेट खेळगड्यांचो खेळ जातालो. मात आतां बरोच बदल जाला. केन्नाय दिसपी सिक्सरी आतां सगल्योच खेळगड्यो मारपाक लागल्यात. बायलां क्रिकेटींत आनीक वेग, चपळाय, शक्त येवची म्हूण प्रशिक्षकांक यत्न करचे पडटले. खास करून आंतरराष्ट्रीय मळाचेर खेळपाक सोदतात त्या चलयांनी सशक्त, चपळ जावचेंच पडटलें. आॅस्ट्रेलियन पंगडाच्या खेळगड्यां मदीं हो गूण दिसता. हायस्कूल, काॅलेज पांवड्याचेर चार चल्यांक पंगडांत घेवन क्रिकेट सर्त खेळ्ळ्यार खेळाक वेग येवं शकता. चले आनी चलयांच्या पंगडां मदींय मॅची जावंक जाय. दोगांयनी मेळून सराव करूं येता. राज्य पांवड्याचेर बायलांचे क्रिकेटीक पुरस्कर्ते जाय. प्रेक्षक तर जायच. ताचे परस चड म्हत्वाचीं आसात तीं मैदानां. गोंयांतल्या दरेका विद्यालयाक स्वताचें मैदान मेळपाची शक्यताय आसा?? गांव पांवड्याचेर चलयांक क्रिकेटीचें प्रशिक्षण दिवचें. गांवांतल्या क्लबांनी बायलांचे क्रिकेट पंगड तयार करचे. सर्तीं दवरच्यो. तालुको, जिल्हो पांवड्याचेर त्यो नेमान जावंक जाय. म्हणटकच खेळगड्यांक अणभव मेळटलो. मुळाव्यो सुविधा मेळप गरजेचें. बायलां क्रिकेट हो करियर आनी पयशे जोडपाचो पर्याय म्हूण दिसूंक जाय. कालच्या भारतीय पंगडाक 51 कोटी रुपयांचें इनाम मेळ्ळां. आनिकूय मेळपाचीं आसात.
दीप्ती शर्मान हे सर्तींत 200+ आनी 20+ विकेटी घेतल्यो. हो विक्रम अजून कोणेच करूंक ना. दादल्यांनी पसून. फायनलींत वुमन आॅफ द मॅच इनाम घेवपी शफाली वर्मा सगल्यांत ल्हान खेळगडी (21 वर्सां) थारली. स्मृती मंधानान हे सर्तींत 434 धांवड्यो काडल्यो. होवूय विक्रम. आॅस्ट्रेलियेन फाटोफाट सगल्याच सर्तींचें वस्तादपण जिखलां. दादल्यांच्या आदल्या वेस्ट इंडिज पंगडा सारकें. मात हाचे मुखार भारतान बायलां क्रिकेटीचें मळ गाजोवचें, अशी सगल्याच भारतीयांची इत्सा आसतली. भारताचें हें पयलें जैत. हाचे आदीं 2005, 2017 त भारत उपजैतीवंत थारिल्लो. कालच्या जैतान बीसीसीआय, भारतीय पंगडांचेर, विशेश म्हणल्यार खेळगड्यांचेर व्हडली जापसालदारकी आयल्या. तांचो फायनलींतलो खेळ पळयल्यार बायलां क्रिकेट चड वेवसायीक करपांत ती यशस्वी जातलीं, हातूंत दुबाव ना. जैता खातीर परबीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
