भांगरभूंय | प्रतिनिधी
मुंबयचो युवा बॅट्समन मुशीर खानाच्या मोटारीक शुक्रारा उत्तर प्रदेशांत भिरांकूळ अपघात जालो. ह्या अपघातांत त्याचे मानेक आनी भुजाक दुखापत जाल्या. दोतोरांनी ताका 16 सप्तक विसव घेवपाचो सल्लो दिला. मुशीराक 1 ऑक्टोबरा सावन सुरू जावपी इराणी करंड मॅच आनी रणजी करंड सर्तीच्यो कांय मॅची चुकतल्यो.
मुशीर, ताचो बापूय नौशाद आनी आनीक दोग जाण मोटारीतल्यान आझमगडांतल्यान लखनौ वताले. तांची मोटार डिव्हायडराक आपटली आनी उमथी पडली. यमुना अॅक्सप्रेसवे हांगा हो अपघात जालो.
मुशीर सध्या फॉर्मांत आशिल्लो. 19 वर्सां पिराये सकयले संवसारीक क्रिकेट सर्तींत ताणें उत्कृश्ट प्रदर्शन केल्लें. ते उपरातं ताणें रणजी करंड सर्तींतलो आपलो पयलो दोट्टी शेंकडो मारिल्लो. फायनलींत विदर्भा आड दुसऱ्या डावांत शेंकडो मारून मुंबय 42वे खेपे वस्तादपण मेळोवन दिवपाक मोलादीक योगदान दिल्लें. पयले श्रेणीचे क्रिकेटींत ताणें 50 परस अदीक सरासरीन 700 परस चड धांवड्यो केल्यात.
इराणी करंड मॅचींत वांटो घेवपाक लखनौ वचपी मुंबय रणजी क्रिकेट पंगडाचो वांगडी मुशीर खानाक पुर्वांचल अॅक्सप्रेसार अपघात जालो. सध्या ताका हांगाच्या खाजगी हॉस्पिटलांत दाखल केला.
मुशीर शुक्रारा सांज वेळार आजमगढांतल्यान लखनौ वचपाक भायर सरिल्लो. पूण, पुर्वांचल अॅक्सप्रेसार ताची मोटार डिव्हायडराक आपटून उमथली. ह्या अपघातांत मुशीराचे मानेक आनी भुजाक दुखापत जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
