भांगरभूंय | प्रतिनिधी
सांगलीतली सिटी हायस्कूल ही एक पोरणी आनी नामना आशिल्ली शिक्षण संस्था. हे शिक्षण संस्थेक ना म्हणत जाल्यार तरी 110 वर्सां परस चड वर्सांचो इतिहास आसा. हालींच हे शिक्षण संस्थेक भेट दिवपाची संद मेळ्ळी. निमित्त आशिल्लें गोंय क्रांतीवीर मोहन रानडे हांच्या तैलचित्राचो अनावरण सुवाळो. सिटी हायस्कुलाच्या सभाघरांतूच गोंय क्रांतीवीर मोहन रानडे हांच्या भव्य अशा तैलचित्राचें अनावरण गोंय विधानसभेचे सभापती रमेश तवडकार हांचे हस्तुकीं जालें, जाल्यार गोंय प्रदेश भाजपाचे अध्यक्ष दामू नायक हांणी मानाचे सोयरे म्हूण हाजेरी लायली. सांगली ही आमकां सगल्यांक प्रीय. मोहन रानडे हांची जल्मभूंय जाल्यार तांचे शिक्षणूय ह्याच सिटी हायस्कुलांत जाल्लें. ताका लागूनच क्रांतीवीर मोहन रानडे हांच्या हांगासरल्या तैलचित्र अनावरण सुवाळ्याक खूब मोटे म्हत्व फावो जाल्लें, आनी आमचे खातीरय मोहन रानडे हांचे प्रती कृतज्ञताय उक्तावपा खातीर चलून आयिल्ली एक संद आशिल्ली. ताका लागूनच सुमार अडेचेशे किलोमिटर पयस आशिल्ल्या ह्या हायस्कुलांतल्या मोहनकाकांच्या तैलचित्र अनावरण सुवाळ्याक हजर रावन तांचे जल्मभुंयेंतूच जाल्ल्या तांच्या मरणोत्तर भोवमानाचो एक साक्षिदार जावपांतलो आनंद ह्या व्हड क्रांतीवीराचो सुमार पन्नासेक वर्सां सहवास लाबिल्ल्या म्हजे खातीर वेगळोच आशिल्लो. सिटी हायस्कुलांतल्या ह्या सुवाळ्या निमतान अर्थांतूच मोहनदादांचे खूबशे पोरणे यादींक जागोवपाचें काम पुण्यांतल्या तांच्याच स्वामी विवेकानंद जिवनज्योत संस्थे खातीर समर्पीत भावनेन कार्यरत आशिल्ल्या कार्यकर्त्यांनी केलें.
गोंय क्रांतीवीर मोहन रानडे हांच्या तैलचित्राचो अनावरण सुवाळो चालू आसतना रावन रावन मनांत एकूच भावनांचें धुमशेण चालू आशिल्लें तें हे खातीर की जांणी गोंयच्या मुक्ती खातीर आपलो जीव घाताक घालो, रगत सांडयलें, ख्यास्ती भोगल्यो, खूबशीं वर्सां एकांतवास भोगलो त्या मोहन रानडे हांचे तांच्या प्रीय गोंयांत स्मारक अजून कित्याक उबें रावंक शकना ह्याच विचारान. मोहन रानडे कुडीन आमचे पसून पयस पयस गेल्यार सुमार पांच वर्सां पुराय जातात. सरकारा कडेन तांच्या स्मारकाचे उबारणीची मागणी लेगीत फाटलीं कांय वर्सां सेगीत जायत आसा, पूण अजून मेरेन हे मागणी कडेन जाय तशें लक्ष कोणें दिल्लें दिसून येना. पुर्तुगेजांच्या शेकातळांतल्यान गोंय स्वतंत्र जावचें हे खातीर मोहन रानडे हांणी स्वताक स्वातंत्र्य चळवळीच्या अग्नकुंडांत कशें झोकून दिलें हें हांगा नव्यान सांगपाची गरज ना, पूण प्रत्यक्षांत गोंय मुक्त जावन आठ वर्सा जांकां आमच्या गोंयांत येवंक आयलें ना, तशें म्हणत जाल्यार कॅशियसचे बंदखणींतूच हो काळ घालोवचो पडलो तशेंच कितें तरी आतांय जातना दिसता. गोंय मुक्ती लढ्यांत सगलें व्हगडावपी ह्या स्वातंत्र्य सैनिका खातीर सरकाराक आदर ना, तांच्या त्यागाची दखल घेनात अशें म्हाका म्हणपाचें ना. उरफाटें मुख्यमंत्री डॉ. प्रमोद सावंत आनी तांचें सरकार स्वातंत्र्य सैनिकांचो व्हड आदरान कदर कशी करता हाचो अणभव लेगीत हालींच आयलो. हुतात्मा बाळा मापारी हांच्या मूळ घरा, सरकार फुडल्या वर्सभरांत स्मारक रुपांत घर बांदून दितलें ही मुख्यमंत्री डॉ. प्रमोद सावंत हांणी केल्ली घोशणा निश्चीतपणान येवकार दिवपी आसा आनी ते खातीर मुख्यमंत्र्याचें खास करून अभिनंदनूच करूंक जाय.
सांगलीतल्या तैलचित्र अनावरण सुवाळ्याक गोंयचे सभापती रमेश तवडकार आनी गोंय प्रदेश भाजपाचे अध्यक्ष दामू नायक ह्या सारक्यांच्या तळागाळांतल्यान आपल्या कार्याच्या बळार वयर येवन आपली वेगळी वळख निर्माण केल्ल्या फुडाऱ्यांची हाजेरी आशिल्ल्यान तांचे कडल्यान मोहन रानडे हांच्या गोंयांतल्या स्मरकाचो प्रस्न उपस्थीत जावये अशें मनांतल्यान दिसतालें आनी अजापूय तशेंच जालें. स्वातंत्र्यवीर मोहन रानडे हांच्या तोखणायेच्या कार्या विशीं सभापती रमेश तवडकार वा प्रदेश भाजप अध्यक्ष दामू नायक हे अनभिज्ञ आसपाचो प्रस्नूच नाशिल्लो. अशा वेळार स्वामी विवेकानंद जिवनज्योत संस्थेचे पदाधिकारी आनी आमचे सयत खूबशा जाणांक मनांतल्यान जें अपेक्षीत आशिल्लें तेंच नेमकें आदीं दामू नायक आनी उपरांत सभापती रमेश तवडकार ह्या सुवाळ्यांत उलयले आनी मोहनदादांची जल्मभूंय आशिल्ल्या सांगलीतल्या खूबशा लोकांनी ताका बरो प्रतिसाद दिलो. क्रांतीवीर मोहन रानडे हांचे उचीत स्मारक उबारपाचे न्याय्य मागणीचेर निर्णय घेवपाक कळाव तर जालाच हें मान्य करतना दामू हांकां कांय गजाली जुळून येवपा खातीर योग येवचो पडटा अशें सांगून क्रांतीवीराचें स्मारक उबे करपा खातीर सगले तरेचे यत्न करतले अशें आस्वासन दिवन सगल्यांकूच थाकाय दिली. उपरांत सभापती रमेश तवडकार हांणी ताचे मुखार वचून मोहन रानडे हांचें स्मारक आसप म्हणल्यार ताचे पसून नवे पिळगेक प्रेरणा जाल्यार मेळटलीच पूण तेचबरोबर स्वातंत्र्य सैनिकांनी केल्ल्या त्यागाक लागूनच स्वातंत्र्याची गोड फळां आमी चाखीत आसात हें मनांत बिंबोवप म्हत्वाचें आसा हाचेर जो भर दिलो तो खूब म्हत्वाचो थारचो.
क्रांतीवीर मोहन रानडे हांचें उचीत स्मारक गोंयांत उबारपाच्या प्रस्तावाक आतां चालना मेळटली हातूंत दुबाव ना. फाटल्या तीन वर्सां परस चड सरकारा कडेन हो प्रस्ताव पडून आशिल्ल्यान संबंदीत फायली वेलो धुल्ल आतां पयस जातलो अशी आस्तूय बाळगूं येता. हेतुपुरस्सर कोणूय हातूंत ‘खो’ घालपाचो यत्न केला अशें म्हाका म्हणपाचें ना, पूण दामू नायक हांणी म्हणिल्ल्या प्रमाण खंयच्याय बऱ्या गजाली खातीर योग हो जुळून येवचोच पडटा. मोहनकाकांचे जल्मभुंयेंत, ते जंय शिकले तेच शाळेंत तांच्या तैलचित्राचें अनावरण जावचें आनी कर्मभूंय आशिल्ल्या गोंयांत तांच्या जायत आशिल्ल्या स्मारकाच्या प्रस्तावाक चालना मेळची हो तसो योगायोगूच म्हणचो पडटलो. सरकारा कडेन दिल्ल्या प्रस्तावांत अर्थांतूच स्मारका खातीरची रुपरेशाय आमी रानडे हांच्याच स्वामी विवेकानंद जिवनज्योत संस्थेच्या माध्यमांतल्यान दवरल्या. क्रांतीवीर मोहन रानडे तांची घरकान्न सर्गेस्त श्रीमती विमल रानडे गोंयच्या समाज आनी महिला कल्याण मंडळाच्यो अध्यक्षा आसतना आनी तांचे उपरांतूय खूबसो काळ चिंबल-रायबंदरच्या घरातं राविल्ले त्या घराचें क्रांतीवीर मोहन रानडे हांचे कायम स्वरुपी स्माक जावचें असोच हो प्रस्ताव आसून, मोहन रानडे हांच्या राबित्यान पावन जाल्ल्या ह्या वास्तूचें स्मारक जावप ही काळाची गरज आसा. हुतात्मा बाळा मापारी हांच्या मूळ घराचें कायम स्वरुपी स्मारक उबारपाचे धरतेरच रानडे हांच्या स्मारकाचे उबारणेक चालना दिवप शक्य आसा. सभापती रमेश तवडकार आनी प्रदेश भाजपा अध्यक्ष दामू नायक हांणी ह्या प्रस्तावाच्या कार्यवाहे खातीर लक्ष घालपाच्या दिल्ल्या आस्वासनां खातीर तांचे मना पसून अभिनंदन!
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
