भांगरभूंय | प्रतिनिधी
भांगरभूंय । प्रतिनिधी
पणजीः स्वातंत्र्याचो लामणदिवो पेटत रावचो हे खातीर गोंयचे क्रांतीवीर मोहन रानडे हाचे फावो अशें यादस्तीक गोंयांत उबारपाक जाय. ताचो राबितो आशिल्ल्या चिंबल- रायबंदर हागच्या सरकारी सुवातेंतल्या तांच्या घराचें ताच्या यादस्तिकांत रुपांतर करपाचे काम राज्य सरकारान करपाचें आवाहन धंपो वाणिज्य म्हाविद्यालयाचो प्राचार्य डॉ मनोज कामत हाणे केलां.
पुण्यातल्या स्वामी विवेकानंद जीवनज्योत ह्या सर्गेस्त मोहन रानडे हांणे स्थापन केल्ले संस्थेन आयोजीत केल्ले ‘यादींतले मोहनदादा ‘ हे कार्यावळींत मुखेल सोयरे म्हणून कामत उलयताले. मोहन रानडे हाचे बाबत केल्ल्या चुकांचें प्रायश्चित म्हणून तांचें यादस्तीक जावचे हे खातीर सरकारान पावलां घालपाची गरज आसा अशे कामत हाणे सांगलें. कार्यावळीचे सुरवेक मोहन रानडे हांच्या फोट्याक फुलां आर्गां ओपलीं. मोहन रानडे हांच्या स्वामी विवेकानंद जीवनज्योत संसथेच्या वावराची तोखणाय करून गोंयांत येवंन ताणी आमकां चिमटो काडला अशें सांगून मोहनदादाच्या यादस्तिकाच्या प्रश्नाचेर कोणूय अनास्था दाखयता जाल्यार वेळार लढो दिवपाची तयारी दवोरपाक जाय अशें डॉ कामत हाणे सांगलें.
कार्यावळीक मानचे सोयरे म्हणून हाजीर आशिल्ल्या लक्ष्मण पित्रे हांणी मोहन रानडे हाणी गोंय मुक्ती खातीर केल्ल्या त्यागाचो उल्लेख करून तांचे फावो तशें यादस्तीक फुडल्या पिळग्यांक प्रेरणा मेळची हे खातीर उबारपाची गरज आसा. चिंबलच्या ज्या घरांतल्यान रानडे हांणी गरीब लोकां खातीर काम केले ताचे परस दुसरी बरी सुवात यादस्तिका खातीर मेळची ना अशें सांगलें. ज्येश्ठ पत्रकार आनी मोहन रानडे हांचो सुमार पन्नास वर्सा सहवास मेळल्ल्या वामन प्रभू हाणे गोंयांत ही कार्यावळ आयोजीत करपा फाटलो हेत सांगलो. जीवनज्योत संस्थेचो कार्यवाह श्रीकांत कुलकर्णी हांणे प्रास्तावीक करतना संस्थेच्या पदाधिकाऱ्यांची वळख करून दिली. संजीव सरदेसाय हाचेय ह्या वेळार भाशण जालें.
मोहन रानडे हाचे जीणचेर संस्थेन तयार केल्लो म्हायतीपट ह्या वेळार दाखयलो. ताचो निर्मातो हेमंत वावले हाणे ताची म्हायती दिली. प्राचार्य सुभाष वेलिंगकार, आदलो आमदार धर्मा चोडणकार, उत्पल पर्रीकार, मुरगांवची नगरसेविका शमी साळकार कार्यावळीक हाजीर आशिल्ली. गोविंत भगत हाणे सूत्रसंचालन केलें आनी अमिता नायक सलत्रीन उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
