भांगरभूंय | प्रतिनिधी
नवी दिल्ली, खबरां संस्था ः केंद्र सरकारान सोमारा दुसरो पॅन प्रकल्प जाहीर केलो. ह्या प्रकल्पा खाला कायम खातें क्रमांक (पॅन) सरकारी संस्थांच्या सगळ्या डिजिटल प्रणालीं खातीर एक सामान्य वेवसाय अभिज्ञापक म्हूण वळखतले. प्रधानमंत्री नरेंद्र मोदी हांच्या अध्यक्षतेखाला सोमारा अर्थीक वेव्हार मंत्रीमंडळ समितीची बसका जाली. ते वेळार आयकर खात्याच्या 1435 कोटी रुपयाच्या प्रस्तावाक मान्यताय मेळ्ळी अशी म्हायती प्रसारण मंत्री अश्विनी वैष्णव हांणी दिली.
पॅन 2.0 प्रकल्पा वरवीं करदात्यांच्या नोंदणी सेवांचें तंत्रज्ञान आदारीत परिवर्तन करप शक्य जातलें. चड बरी, बेगीन आनी सोंपेंपणान सेवा मेळोवप हो ह्या प्रकल्पाचो हेत आसा. सध्या भारतांत 78 कोटी पॅन कार्ड जारी केल्यात, तातूंतले 98 टक्के पॅन कार्ड वैयक्तीक आसात.
नव्या पॅन कार्डाचेर क्यूआर कोड आसतलो. हाचे खातीर पेपरलेस म्हळ्यार ऑनलायन प्रक्रिया आपणायतले. क्यूआर कोड आशिल्ल्या पॅना खातीर लोकांक वेगळो खर्च करपाची गरज ना. नव्या पॅनांत डेटा पुरायपणान सुरक्षीत आसतलो.
ते भायर केंद्रीय मंत्रीमंडळ बसकेंत तीन नव्या रेल्वे प्रकल्पांक मान्यताय दिल्या. शेतकारांक राष्ट्रीय सैमीक शेती मिशन, तरणाटे आनी विद्यार्थ्यां खातीर ‘वन नेशन वन सबस्क्रिप्शन’ आनी अटल इनोव्हेशन मिशन 2.0 ह्या तीनूय प्रकल्पांकूय मंजूरी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
