कौशल्य विकसीत करया, फुडार आपसूकच घडटलो !

भांगरभूंय | प्रतिनिधी

कृत्रीम तंत्रज्ञानाच्या ह्या काळांत फाल्यां आमच्या पानार कितें वाडून दवरलां म्हणपाची कल्पना लेगीत करप कठीण अशी परिस्थिती आसा. देखूनच जो भुरगो आपले कल्पकतायेन, बुद्धिमत्तेन आनी धाडसान फाल्यांचे नदरेन आयचे कडेन पळयतलो तोच तगपाक शकतलो.

गोंय शालान्त मंडळाचे धावी- बारावी यत्तेचे निकाल जाहीर जाल्यात. आतां फुडें कितें हो हुस्को बऱ्याच पालकांक आनी भुरग्यांक सतायता. कांय जाणांचे निर्णय आदींच जाल्ले आसात. भोवतेक गोंयकार भुरगे आनी तांचे पालक अजून परंपारीक शाखांचीच वाट चलपाक पसंती दितात. भुरग्याचें शिक्षण पुराय जाले उपरांत पांच- सात वर्सां उपरांत परिस्थिती कितें आसतली, कितें गरजो आसतल्यो हाचो ते विचार करिनात. आदल्या काळार बदल सवकासायेन घडटाले. आतां तंत्रज्ञानाच्या युगांत वेगा कडेन सर्त करपाक भुरगे फाटी पडले जाल्यार तांचो फुडार पर्जळीत जावपाक अडचणी येतल्यो हाचो पालकांनी विचार करपाक जाय. काल विकतो घेतिल्लो मोबायल फोन बदलत्या तंत्रज्ञानाच्या युगांत आयज काळा भायरो जाता आनी अर्द्या मोलाक लेगीत तो खरेदी करपाक कोण मुखार सरना. काळा प्रमाणे आपले मदीं बदल करीत रावतलो, स्वताक अद्यावत करत रावतलो तोच ह्या तांत्रीक आनी धांवत्या युगांत तग धरपाक शकतलो.
आयचो काळ हो कौशल्याचेर आदारीत कारकिर्द विकासाचो काळ. राष्ट्रीय शिक्षण धोरणांतय ताचेरच चड भर दिल्लो आसा. ह्या धोरणाचो पालक, विद्यार्थी आनी दुर्दैवान शिक्षणा कडेन संबंधीत खंयच्याच घटकान गंभिरतायेन विचार आनी अभ्यास केल्लो दिसना.
मडगांव शारांतलो रस्सा ऑमलेट हो एक फामाद खाद्य प्रकार. सागर आनी उल्हास हांच्या गाड्यार तर रस्सा ऑमलेट खातलो जाल्यार उणींच पांच- धा मिणटां रांकेंत उबे रावचें पडटा. सांजवेळां सात ते धा ह्या फक्त तीन वरांत आपलो धंदो चलोवन ते हजारांनी रुपयांची येणावळ कमयतात. आपल्या कौशल्याचो तांणी आपलो धंदो चलोवपाक आनी येणावळ जोडपाक बेस बरो करून घेतला. रुचीक ऑमलेट तयार करून ताचेर सुवादीक चिकन रस्सा घालप आनी हांसत्या तोंडान तो गिरायका मुखार दवरप हें तांचें कौशल्य. आयज मडगांवां तांणी आपली खाशेली वळख घडयल्या. उपचारीक शिक्षणांत फाटी आशिल्ले साबार जाण आपल्या आंगांत आशिल्ल्या कारागिरीन, चित्रकलेच्या कौशल्यान आपली उपजिविका बरे तरेन चलयतात म्हणपाच्यो साबार देखी आसात.
व्हॉटस्पार हे संबंधांत वाचिल्ली एक कथा याद जाता. फामाद फिल्म दिग्दर्शक शेखर कपूर हांच्या नांवान ती प्रसिद्ध जाल्ली. धा- बारा वर्सां आदली खबर. शेखर कपूर हांणी अमेरिकेच्यान एक किंमती ब्लॅकबेरी फोन विकतो घेतिल्लो. कांय दिसांनी तांतूंत तांत्रीक बिघाड आयलो. त्या काळार भारतांत ब्लॅकबेरीचीं सर्व्हीस सेंटरां नाशिल्लीं. साबार मोबायल दुकानांनी शेखर कपूर हांणी आपल्या मोबायलाची दुरुस्ती करप शक्य आसा काय म्हूण वासपूस केली. पूण सगल्यांनी हात वयर केले. हो फोन आतां दुरुस्ती खातीर कुरियरान अमेरिकेक धाडचो पडटलो आनी ताका उणेच तिशेक हजार खर्च येतलो असो सल्लो कांय हायफाय एसी मोबायल सर्व्हीस सेंटरांनी ताका दिलो. दुरुस्ती खातीर मोबायल अमेरिकेक धाडपा बगर दुसरो पर्याय नाशिल्लो. एक दीस तांणी आपली गाडी रस्त्या कुशीच्या एका ल्हानश्या मोबायल दुरुस्ती दुकाना सामखार थांबयली. दुकानार ‘Cellphoon reapars’ अशी पाटी मारिल्ली! धाडसान शेखर कपूर दुकाना कडेन आयले. त्या अस्तावस्त दुकानांत एक सतरा- अठरा वर्सांचो सादोसोच दिसपी एक भुरगो पिंजकी जिन्स आनी टीशर्ट घालून काम करतालो.
“ब्लॅकबेरी ठीक कर पाओगे?” शेखर कपूर हांणी त्या भुरग्याक अविश्वासानच प्रस्न केलो. “बिलकुल, क्यों नहीं” भुरग्यान तितल्याच आत्मविस्वासान जाप दिली. ब्लॅकबेरीचो इबाडिल्लो पार्ट त्या भुरग्यान कांय खिणां भितरच बदल्लो आनी तो शेखर कपुराच्या हातांत दिलो. “कितना देना है?” शेखर कपूरान प्रस्न केलो. “पाचसो” भुरग्यान जाप दिली.
फोन अमेरिकेक धाडपाचे प्रक्रियेचो आनी तिशेक हजार खर्चाचो विचार केल्यार पांचशीं रुपया म्हणल्यार सामान्य रक्कम आशिल्ली. शेखर कपूर रक्कम फारीक करून आपले गाडये कडेन वचपाक भायर सरतना त्या भुरग्यान ताका हटकीत “सरजी, ब्लॅकबेरी इस्तेमाल करना है तो हाथ साफसुथरे होने चाहिये. गंदे हाथसे इस्तेमाल करोगे तो ये प्रॉब्लेम आ सकता है” अशी सुचोवणीय केली. आंगार म्हेळे कपडे आशिल्लो तो तरणाटो कोटयांनी रुपयांचो धनी आशिल्ल्या एका फामाद दिग्दर्शकाक उपदेश करतालो!
हे सामान्य भुरगे आधुनीक तंत्रज्ञानाचें शिक्षण खंयच्यान घेतात काय असो प्रस्न ही काणी सांगून जातगीच शेखर कपूर विचारतात.
गोंयांत मोपा विमानतळ येवपाचो आसा, थंय कसल्यो नोकऱ्यो तयार जातल्यो ताची वासपूस करात आनी गरजेचें शिक्षण घेवन दवरात म्हूण वेवसायीक मार्गदर्शन करपी गोंयकार आठ- धा वर्सां आदीं ताळो सरांटून सांगत रावले. पूण कोणेच कानामनार घेतलें ना. जेन्ना विमानतळा वेलीं उंचेलीं पदां भरपाचो वेळ आयलो तेन्ना ह्या पदां खातीर गरजेची पात्रताय गोंयकार तरणाट्यां कडेन ना म्हणपाची गोंयकार तरणाट्यांक जाणीव जाली.
गोंय सरकाराचें भौशीक सेवा आयुक्तालय आसा. शासनांतलीं उंचेलीं पदां भरपाची जापसालदारकी ह्या आयुक्तालयाचेर आसा. ताचें नांव लेगीत कांय गोंयकार शिक्षीत तरणाट्यांनी आयकल्लें ना म्हणपाची खंत स्वता गोंयच्या मुख्यमंत्र्यांनी हालींच एका भासाभाशेंत व्यक्त केल्या. केदी व्हड शोकांतिका ही?
कृत्रीम तंत्रज्ञानाच्या ह्या काळांत फाल्यां आमच्या पानार कितें वाडून दवरलां म्हणपाची कल्पना लेगीत करप कठीण अशी परिस्थिती आसा. देखूनच जो भुरगो आपले कल्पकतायेन, बुद्धिमत्तेन आनी धाडसान फाल्यांचे नदरेन आयचे कडेन पळयतलो तोच तगपाक शकतलो.
ते खातीर पालक, शिक्षक, शासन हांणी विद्यार्थ्याक गरजेचें मार्गदर्शन आनी प्रोत्साहन दिवचें पडटलें.

अनंत अग्नी
9422439903