भांगरभूंय | प्रतिनिधी
2011त भारतान सचिन तेंडुलकरा खातीर संवसारीक सर्त जिखिल्ली, तशीच हे खेपे भारताच्या पंगडान विराट कोहली खातीर संवसारीक सर्त जिखपाक जाय अशें भारताचो आदलो बॅट्समन वीरेंद्र सेहवागान म्हणलां.
आयसीसीन मंगळारा संवसारीक वन डे सर्तीचें वेळापत्रक जाहीर केलें. वेळापत्रका प्रमाण 5 ऑक्टोबराक न्युझिलॅण्ड आनी इंग्लंड ह्या पंगडां मदीं उक्तावणाची मॅच जातली.
2011 उपरांत भारतान फकत एकूच आयसीसी सर्त जिखल्या. फाटल्या सुमार 10 वर्सां सावन भारत आयसीसी करंड जिखपाची वाट पळयता. संवसारीक सर्तीचे कार्यावळीची घोशणा करपा खातीर आयसीसीन आयोजीत केल्ले कार्यावळींत उलयतना सेहवागान म्हणलें, 2011तली सर्त आमी सचिन तेंडुलकरा खातीर खेळिल्ली आनी जिखले लेगीत. हे खेपे विराट कोहली सध्या भारताच्या पंगडांत तेच भुमिकेंत आसा.
कोहली 5 नोव्हेंबराक 35 वर्सां पिरायेचो जातलो. फुडले संवसारीक सर्ती वेळार तो 39 वर्सां पिरायेचो जातलो. कोहली तंदुरुस्त उरलो जाल्यारूय ताका फुडले संवसारीक सर्ती खातीर पंगडांत सुवात मेळटली म्हणून खात्री दिवं नजो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
