भांगरभूंय | प्रतिनिधी
नवी दिल्ली, खबरां संस्था ः संवसारभर 2019 ते 2021 ह्या काळांत पाताळिल्ल्या ‘कोविड-19’ म्हामारीक लागून संवसारीक आयुश्य 1.6 वर्सां उणे जाल्याचे धक्कादायक निश्कर्श ‘द लॅन्सेट जर्नल’ ह्या पत्रांत उजवाडाक आयल्ल्या संशोधनांतल्यान काडला. हाचे वयल्यान आतां मेरेन जाल्ली उदरगत खूब फाटीं पडल्ल्याचे दिसून येता. ‘इन्स्टिट्यूट फॉर हेल्थ मेट्रिक्स अँड इव्हॅल्यूएशन’ आनी ‘युनिव्हर्सिटी ऑफ वॉशिंग्टन’ हांणी मेळून हें संशोधन केला.
ह्या संशोधनांतल्यान ‘कोविड-19’ म्हामारीच्या पयल्या दोन वर्सांच्या संदर्भांतल्या लोकसंख्याशास्त्रीय कलांचें पुराय मुल्यांकन केलां. हांतूत संवसारभर भलायकी वेवस्थेचेर, अर्थवेवस्थेचेर आनी समाजाचेर जावपी परिणाम सोदून काडपाचो यत्न केला अशें संशोधकांनी सांगलां. संवसारीक लोकसंख्येचे पिराय वाडपा संबंदी केल्ल्या संशोधनाचोय तातूंत आस्पाव आसा.
ह्या अभ्यासांत ‘कोविड-19’ म्हामारीच्या काळांत 84 टक्के देशांनी आनी प्रदेशांनी आयुश्य उणें जाल्ल्याचें दिसून आयलां. हातूंतल्यान कोरोना व्हायरसाचे विध्वंसक परिणाम दिसतात असो उल्लेख संशोधकांनी केला. मेक्सिको शार, पेरू, बोलिव्हिया ह्या सारकिल्ल्या शारांनी आनी देशांनी चड लुकसाण जाल्ल्याचे दिसून आयला. संवसारभर 2020 आनी 2021 ह्या दोन वर्सांत प्रौढांच्या मरणांचे प्रमाण वाडले. पांच वर्सां सकयल्या भुरग्यांचें मरण प्रमाण 2019 वर्साच्या तुळेंत 2021 वर्सा सुमार पांच लाखांनी उणें जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
