कोळसो हाताळणी वाडोवपाक परवानगी ना: डॉ. प्रमोद सावंत

भांगरभूंय | प्रतिनिधी

जेटींचेर कोळसो हाताळणी करतात ताचें प्रमाण लेगीत उणें

पणजी: आमच्या सरकारान हाचे आदीं कोळसो हाताळणी वाडोवपाक परवानगी दिल्ली ना. हाचे मुखारूय एमपीटी सयत हेर खंयच्याच बंदराचेर कोळसो हाताळणी वाडोवपाक परवानगी दिवचे नात. फुडारांत खंयच्याच नव्या जेटीचेर कोळसो हाताळणी खातीर परवानगी दिवचे नात. तशेंच मसुदो सीझॅडएमपी 2019 तल्या बंदर मर्यादा काडटले अशें मुख्यमंत्री डॉ. प्रमोद सावंत हांणी सांगलें. मंगळारा विधानसभेंत आमदार विजय सरदेसाय हांणी उपस्थीत केल्ल्या लक्ष ओडपी सुचोवणेचेर ते उलयताले.

मुख्यमंत्र्यांनी म्हणलें, खूबशे जाण गोंयांत कोळसो येतलो म्हूण लोकां मदीं भिरांत घालीत आसात. पूण गोंयांतल्या फक्त एक वा दोन जेटींचेर कांय कंपनीं कोळसो हाताळणी करतात. ताचें प्रमाण लेगीत उणें आसा. भोवतेक जेटींचेर लोहखनीज हाताळटात. आमी खंयच्याय अंतर्गत उदका मार्गांचेर कोळसो हाताळणी खातीर नव्या जेटींक परवाने दिवचे नात. गोंयांत हाचे मुखार कोळसो हाताळणी वाडची ना अशें आस्वासन हांव लोकांक दितां.

तांणी मुखार म्हणलें, हाचे आदीं सभाघराच्या वांगड्यांनी सीझॅडएमपी 2019तल्या बंदर मर्यादे विशीं प्रस्न उपस्थीत केले. सद्या हेविशींचो मसुदो आराखडो तयार जाला. तो अजून भौशीक केल्लो ना. आराखडो सरकाराच्या विवीध खात्यां कडेन दिला. तांचे कडल्यान आराखड्या विशीं मत घेतले. बंदर मर्यादा कुशीक काडपा विशीं बंदर कप्तान खात्या कडल्यान शिफारस घेतले. हे विशीं जावपी जनसुनावणे पयलीं मसुद्यांत दाखयिल्ल्यो सगल्यो बंदर मर्यादा काडटले.

ताचे पयलीं आमदार विजय सरदेसाय हांणी सागरमाला प्रकल्पाक लागून गोंयांतल्या न्हंयांचो ताबो केंद्र सरकाराक वतलो अशें सांगलें. हाका लागून न्हंय, दर्यादेगांचेर निंबून आशिल्ल्या थळाव्या लोकांचेर परिणाम जातलो असो आरोप तांणी केलो.

आमदार विरेश बोरकार हांणी बंदर मर्यादा घाल्ल्यान नुस्तेमारांक त्रास जातलो अशें सांगलें. आमदार आलेक्स सिक्वेरा हांणी सागरमालांतल्यान गोंयच्यो न्हंयो वगळच्यो हे खातीर 2025त समजिकायेची कबलात केल्ल्याचें सांगलें.

सगल्यो न्हंयो गोंयच्या ताब्यांत उरतल्यो

गोंयच्यो सगल्यो न्हंयो गोंयकारां खातीरच आसात. गोंयजी जुवारी वा हेर खंयचीच न्हंय केंद्राच्या ताब्यांत दिवचे नात. हे विशींचे अधिकार गोंय सरकारा कडेन आसात अशें मुख्यमंत्री डॉ. प्रमोद सावंत हांणी सांगलें.