भांगरभूंय | प्रतिनिधी
पणजी: मुरगांव बंदर प्राधिकरण वाठारांत जावपी कोळसो हाताळणीक लागून कामगार आनी थळाव्यांचे भलायकेचेर नेमको कितें परिणाम जाता, हाचो खोलायेन अभ्यास करपाची जापसालदारी केंद्र सरकाराच्या ‘आयसीएमआर-नॅशनल इन्स्टिट्यूट ऑफ ऑक्युपेशनल हेल्थ’ अहमदाबाद हे संस्थे कडेन दिल्या. मुख्यमंत्री डॉ. प्रमोद सावंत हांणी विधानसभेंत ह्या म्हत्वाच्या सर्वेक्षणाची म्हायती दिली.
ह्या अभ्यासांत मुखेलपणान कोळशाच्या धुल्लाक लागून जावपी स्वासाचे विकार आनी बाधितांच्या शरीरांतल्या जड धातूंचें प्रमाण तपासतले. बंदराच्या आशिकुशीक रावपी नागरिकांचे भलायके विशीं शास्त्रीय आंकडेवारी एकठांय करप आनी फुडारांतल्या पर्यावरणाच्या उपाय येवजण्यांक दिका दिवप, हो ह्या अभ्यासाचो मुखेल उद्देश.
कोळसो हाताळणीच्या मर्यादे विशीं स्पश्टीकरण दितना मुख्यमंत्र्यान म्हणलें, गोंय राज्य प्रदूशण नियंत्रण मंडळान सावथ वेस्ट पोर्ट लिमिटेड वा अदानी समुहाक २०१२ त निश्चीत केल्ले मर्यादे परस चड कोळसो हाताळपाची परवानगी दिवंक ना. कोळसा हाताळणी विशींचे सगले नेम कडक पाळिल्ल्यान, भौशीक भलायकी आनी पर्यावरणा कडेन कसलेच तरेची तडजोड करचे नात, अशी गवाय मुख्यमंत्र्यांनी दिली. ह्या विज्ञानीक अभ्यासाक लागून आतां कोळसो प्रदूशणाचें सत मुखार येवपाक मजत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
