भांगरभूंय | प्रतिनिधी
मुरगांव पालिका घेतली ‘कोळसो हाताळप बंदा’चो थाराव
मुरगांवः मुरगांव नगरपालिका वाठारांत कोळसो हाताळप बंद करपाचो थाराव संमत करपाचो निर्णय मुरगांव पालिका मंडळान घेतला. हे संबंदी आमदार संकल्प आमोणकार हांणी मुख्यमंत्री डॉ. प्रमोद सावंत हांचे वांगडा संयुक्त बसका आपोवपाची मागणी नगरसेवकांनी केल्या.
कोळसो प्रदुशणा संबंदी मुरगांव नगरपालिकेचे नगराध्यक्ष गिरीश बोरकार हांणी आपयल्ले खाशेले संयुक्त बसकेक कोळसो हाताळपी युनिट, आमदार, आनी एमपीए हाजीर नाशिल्ले.
कोळसो हाताळप बंद करपा खातीर ‘रोड मॅप’ तयार करपाची गरज आसा अशें आमदार संकल्प आमोणकार हांणी सांगलें. फुडले पिळगेचे बरे भलायके खातीर कोळसो बंद करचो अशें आमदार आमोणकार हांणी म्हणलें. येवपी नगरपालिका वेंचणूक आनी विधानसभा वेंचणुके आदीं कोळशाचेर राजकी स्टंट करचे न्हय अशें आवाहन आमदार आमोणकार हांणी नगरसेवकांक केलां. मुरगांवांत कोळसो हाताळप बंद करपा खातीर तांणी पालिका मंडळाक शक्य तितले सहकार्य करपाचें आश्वासन दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
