भांगरभूंय | प्रतिनिधी
काणकोणः फाटल्या देड म्हयन्या सावन काणकोण पालिकेंतल्या कोळंब वाठारांत धुमशेण कांडिल्ल्या बिबट्याक धरपाक रान खात्याक येस आयलां.
कोळंब वाठारांतल्या एका मनशाची पोशिल्लीं सुणी बिबट्यान व्हेल्यांत, अशी म्हायती थळावे नगरसेवक शुभम कोमरपंत हांणी एका म्हयन्या आदीं रान खात्याक दिल्ली. तशेंच त्या बिबट्याक धरपाची मागणी केल्ली.
ह्या वाठारांत दोन व्हड आनी एक ल्हान अशें तीन बिबटे वावुरतात. तातूंतली मादी जातीचो बिबटो शेनवारा फांतोडेर लायिल्ल्या सांपळ्यांत आडकलो. अजून दोन बिबटे मेकळेच आसात, अशी म्हायती शुभम कोमरपंत हांणी दिली.
पांजऱ्यांत बिबटो सांपडिल्ल्याची म्हायती रान खात्याच्या अधिकाऱ्यांक दिले उपरांत रान अधिकारी वायंगणकार, सुहास नायक, रोहीत आनी हेरांनी येवन ताका बोंडलाच्या अभयारण्यांत धाडून दिलो. मजगतीं, आनीक दोन बिबटे त्या वाठारांत वावुरतात हे खातीर रान खात्यान परतून थंय पांजरो लायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
