भांगरभूंय | प्रतिनिधी
कोल्हापूर, खबरां संस्था: गोंयांतूच विकपा खातीर केल्लो गोंयचो सोरो बेकायदेशीरपणान कोल्हापूर व्हरून सोर्याची तस्करी करपी २१ वर्सां पिरायेच्या तरणाट्याक कोल्हापूर अबकारी खात्याच्या पंगडान अटक केली. ताचे कडल्यान वट्ट ५ लाखांचो सोरो जप्त केलो. हो प्रकार शेनवारा घडलो.
हे विशीं चड म्हायती प्रमाण, एक तरणाटो गोंयच्यान सोर्याचो सांठो घेवन कोल्हापुरांत येवपाचो आशिल्ल्याची गुपीत म्हायती अबकारी खात्याच्या पुलिसांक मेळिल्ली. तांणी एका पंगडाची स्थापना केली. मजगतीं कोल्हापुरांतल्या हॉकी स्टेडियम वाठारांतल्या आयसोलेशन हॉस्पिटला लागसारा एक गाडी आयली. राज्य उत्पादन शुल्क विभागाचे उपाधीक्षक युवराज शिंदे हांच्या नेतृत्त्वा खाला पंगडान गाडयेची तपासणी केली.
कारवाये मजगतीं पांच लाख रुपयांचीं गोंयच्या सोर्याचीं ७५ बॉक्सां आनी ५ लाखांची गाडी असो मेळून १० लाखांचो मुद्देमाल जप्त केलो. गाडयेंतल्यान गोंयच्या सोर्याची तस्करी करपी सिंधुदुर्ग जिल्ह्यांतल्या शिरोडेंच्या डॅरेल फर्नांडीस हाका अटक केली. मजगतीं, तो कोणा खातीर सोरो घेवन भायर सरिल्लो काय? हाचो सोद राज्य उत्पादन शुल्क विभागाचे अधिकारी घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
