भांगरभूंय | प्रतिनिधी
एका शेतकारागेर बोकडी आनी ताची पिलां आशिल्लीं. ती आपल्या धनयाक कसलेच त्रास दिनाशिल्लीं. आपल्या खाणजेवणाची वेवस्था आपले आपूण करतालीं. एक दीस तीं चरता चरतां रानांत पावलीं. थंय कोल्यान बोकडे कडेन इश्टागत केली. बोकडेकूय आपल्याक इश्ट मेळिल्ल्याची खोस जाली. तण खाता खाता आनी कोल्या कडेन उलयता उलयता वेळ कसो पासार जातालो तो तांकां कळच नाशिल्लें .एक दीस असोच कळाव जालो. बोकडेक दिसलें, पोरां भुकेन आपल्या आवयक सोदता आसतलीं म्हूण. ती चिंतेस्त जाली. कोल्यान म्हळें, “तूं भियेनाका ” तुजे वांगडा हांव येतां. तुका वेवस्थीत घरा पावयले बगर म्हाका सुशेग लागचो ना. बोकडेच्या जिवाक बरें दिसलें . उलयत उलयत ती आपल्या घरा पावली. आपल्या आवयलो आवाज आयकतकच उमेदीन उडक्यो मारीत आवय म्हऱ्यांत आयली आनी दूद पिवंक लागलीं ताच्या त्या दोग जाण पिलांक पळोवन कोलो लाळ गळोवंक लागलो. कशेय करून हांकां खावन उडोवपाचीं सपना रंगोवंक लागलो. पूण बोकडेन मात आपल्या पिलांक शिटकावन दवरिल्लें, आपणें आवाज दिले बगर तुमी भायर येवपाचें ना.
एक दीस बोकडी चरूंक गेल्ली ती कोल्यान पळयली. बोकडेचो सदचो घरा येवपाचो वेळ कोल्याक खबर आशिल्लो . मात्सो वेळ पयलीं कोलो बोकडेगेर गेलो आनी दारार मारलें. पिलांनी कोण म्हूण भितरल्यान आवाज दिलो. कोल्यान बोकडेचो आवाज काडपाचो यत्न केलो. तांणी म्हळें म्हज्या आवयचो आवाज न्हय आमी दार काडची ना . तुमचीच आवय रे हांव शाण्यांनो. अशें परतें कोल्यान म्हळें. पिलान जनेलांच्या फटींतल्यान पळयलें जाल्यार कोलो सामके कान उबे करून दार काडटा काय हाची वाट पळयतालो. इतले म्हणसर बोकडी येता ती कोल्यान पळयली आनी थंयच्यान धांव मारली. भियेल्लीं पिलां आपल्या आवयच्या वेंगेंत गेलीं.
पिलांक खावपाचें कोल्याच्या मनांतलें कशेंच वचूंक नाशिल्लें. ते खातीर कोलो दीस रात बोकडेचो आवाज काडपाचो सराव करूंक लागलो. कांय तेपान बोकडी घरा नाशिल्ल्याची सुलूस लागतकच कोल्यान परतें दारार मारलें, आनी बोकडेवरी में ऽऽ में ऽऽ असो आवाज काडून ताणें पिलांक आपयलें. तांकां आपल्या आवयचोच आवाज कसो दिसलो आनी फाटलो फुडलो विचार करिनासतना दार उक्तें केलें. कोल्यान रोखडीच ताचेर झडप घाली. दुसरें पिल आशिल्लें तें आकांतान रडपाक लागलें. त्या पिलाचो वेळ बरो आशिल्लो. वाड्या वयल्या सुण्यांनी पिल आकांतान रडटा तें आयकलें. सुण्याचें एक बरें आपल्या वाड्यार अनवळखी कोणूय आयल्यार तीं ताका भोंकून थंयच्यान धांवडायले बगर रावनात. कोलो आबूज जालो आनी पिलाक आपल्या तोंडांतलें सोडून थंयच्यान फुज्ज्यो मारली.
एकवटान बळ आसता.
अलका सिनाय असोळडेकार
9822981107
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
