भांगरभूंय | प्रतिनिधी
मडगांव, प्रतिनिधी ः गांजो दवरिल्ल्या प्रकरणांत सोनू कुमार चव्हाण (24, मुळ उत्तर प्रदेश) हाका कोलवा पुलिसांनी अटक केल्या. दुबाविता कडल्यान सुमार 2.40 लाखांचो गांजो जप्त केल्यांत.
कोलवा वाठारांत गांजो विक्री जावपा विशीं गुप्त म्हायती पुलिसांक मेळ्ळी. ते प्रमाण सोमारा रातीं गस्त घालतना गवंडाळे – कोलवा वाठारांत दुबावीत रितीन हालचाल करपी एक मनीस कोलवा पुलिसांक मेळ्ळो. पुलिसांनी उल्लेख केल्ल्या मनशाची चवकशी केली तेन्ना तांकां ताचे कडल्यान योग्य जाप मेळ्ळी ना. देखून पुलिसांनी ताची तपासणी केली तेन्ना दुबावीत सोनू कुमार चव्हाण हाचे कडेन 2 किल 401 ग्राम गांजो सांपडलो. बाजारांतल्या दरा प्रमाण ताचो दर सुमार 2,40,001 रुपया इतलो आसा.
कोलवा पुलिसांनी ताचे आड अमली पदार्थ विरोधी कायद्या खाला फावो त्या कलमा खाला गुन्यांव नोंद करून दुबाविताक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
