भांगरभूंय | प्रतिनिधी
मडगांवः बंदी आसून लेगीत दक्षीण गोंयच्या कोलवा सेकंड वॉर्ड वाठारांत धिरयोचें आयोजन केल्ल्या प्रकरणांत महेश चव्हाण (फातोड्डें) आनी विनय फर्नांडीस (बाणावली) हांचे आड गुन्यांव नोंद केलां.
कोलवा सेकंड वॉर्डांतल्या उक्त्या सुवातेर ‘बाला’ आनी ‘गुलाल’ ह्या दोन गटां मदीं जाल्ल्या धिरयोची म्हायती मेळ्ळे उपरांत पुलिसांनी रोखडीच चवकशी सुरू केली. तपास जाले उपरांत महेश चव्हाण आनी विनय फर्नांडिस हांचे आड गुन्यांव नोंद केलो.
24 जुलयाक जाल्ल्या ह्या धिरयोचो व्हिडियो सोशल मिडियाचेर व्हायरल जाले उपरांत ही घडणूक उजवाडाक आयली. दक्षीण गोंय जिल्लोधिकाऱ्यांनी पयलींच धिरयोचेर बंदी घालपाचो आदेश जारी केला आनी ताची अंमलबजावणी करपा खातीर सात विशेश समित्यो नेमल्यात. ह्या प्रकरणाची चवकशी पुलीस निरिक्षक विक्रम नायक हांच्या मार्गदर्शना खाला उपनिरिक्षक रक्षा नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
