भांगरभूंय | प्रतिनिधी
पणजी ः कोलवा दर्यादेगेर रस्ताद सुण्यांचो वावर वाडला. बुधवारा, ३ डिसेंबराक रशियन बायल पर्यटकाक सुण्यान चाबिल्ल्याची घडणूक घडली. हे घडणुकेक लागून रस्ताद सुण्यांचो प्रस्न परतून एक फावट मुखार आयला.
बुधवारा झिना नांवाची रशियन बायल पर्यटक कोलवा दर्यादेगेर पासय मारताली. ते वेळार तिचेर रस्ताद सुण्यान हल्लो केलो. ह्या हल्ल्यात तिच्या डाव्या हाताच्या बोटाक आनी मांडयेक जखम जाल्या. उपरांत तिका रोखडीच हॉस्पिटलांत व्हेली आनी इंजेक्शन दिलें. माजोर्डा हांगा रावपी झीना हिणें सांगलें, कोलवा दर्या तिका खूब आवडटा देखून हांव नेमान हांगा पासयक येता.
बेगोबेग डॉग शॅल्टर उबारपाची सरकारा कडेन मागणी
झीनान प्रसार माध्यमां कडेन उलयतना सरकारान रस्ताद सुण्यांक मारचे परस डॉग शॅल्टर उबारपाची मागणी केल्या. अशा डॉग शॅल्टराक लागून मनीसपणाचे नदरेन ह्या प्रस्नाचेर कायम स्वरूपी उपाय मेळटलो अशें मत तिणें उक्तायलें. तशेंच कोलवा दर्यादेगेर येवपी पर्यटकांक रस्ताद सुण्यांक लागून आनी कांय वाठारांनी जमिल्लो कोयर आनी तातूंतल्यान भायर सरपी दुर्गंधीक लागून त्रास जातात अशेंय तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
