भांगरभूंय | प्रतिनिधी
शौचालयाचीं दारां बसोवपाच्या आनी हेर कामाक सुरवात
भांगरभूंय । प्रतिनिधी
पणजी : कोलवाळ बंदखणींत शौचालयाचीं दारां बसोवपा सयत हेर कामां सुरू जाल्यात, अशी म्हायती अतिरिक्त बंदखण म्हानिरिक्षक स्नेहल गोलतेकार हांणी दिली. इमारतीचें रंगकाम तशेंच हेर कामां भौशीक बांदकाम खात्या वरवीं जातलीं, अशें तांणी सांगलें.
कोलवाळ बंदखण इमारतीची दुरुस्ती, उदकाची वेवस्था हाची म्हायती बंदखण म्हानिरिक्षक कार्यालयान संबंदीत खात्यांक कळयल्या. निविदा काडून कामां करपाची जापसालदारी संबंदीत खात्यांची आसा, अशें तांणी सांगलें.
कोलवाळ बंदखणींत कैद्यां खातीर मुळाव्या सुविधांचो उणाव आसा, अश्यो कागाळी कैद्यां कडल्यान येताल्यो. हाचे उपरांत मानवाधिकार आयोगान बंदखणीची पळोवणी केली. मानवाधिकार आयोगाचे अध्यक्ष डेस्मंड डिकोस्ता, वांगडी प्रमोद कामत तशेंच हेर अधिकारी हाजीर आशिल्ले.
कोलवाळ बंदखणींत दादल्यां सयत बायलांच्या शौचालयाक दारां नात. हाका लागून कैद्यांची प्रायव्हसी धोक्यांत आसा, अशें मानवाधिकार आयोगान अहवालांत म्हणलां. इमारत बाबत आसा. इमारतीची दुरुस्ती तशेंच रंग मारपाची शिफारस केल्या. भौशीक बांदकाम खात्या वरवीं इमारतीची दुरुस्ती चालू आसा. शौचालयाचीं दारां मोडल्यात. दुसरीं दारां प्राधान्यान बसयतले, अशें अतिरिक्त बंदखण म्हानिरीक्षकांनी सांगलें.
कोलवाळ बंदखणीचे देखभाली खातीर अर्थसंकल्पांत थारावीक तजवीज आसता. हे तजविजे प्रमाण कामां करपाची जापसालदारी भौशीक बांदकाम खात्याची आसता. भौशीक बांदकाम खात्या कडल्यान दुरुस्ती तशेंच इमारतीची देखभाल जावपाक जाय. मानवाधिकार आयोगाच्या अहवालाची प्रत भौशीक बांदकाम खात्याक लेगीत आमी धाडून दितले, अशें बंदखण म्हानिरिक्षकान सांगलें. कोलवाळ बंदखणींत उदक आसा. थंड उदका खातीर कुलर तशेंच हून उदका खातीर हिटर बसोवपाची तजवीज दुरुस्तीच्या कामांत आसा. कुलर आयले उपरांत रोखडोच तो बसयतले, अशें तांणी सांगलें.
भलायकी खात्या कडेन नर्सी आनी महिला दोतोरांचो उणाव आसा. हाका लागून बंदखणींत महिला कैद्यांक तपासपा खातीर महिला दोतोर तशेंच नर्सींची वेवस्था करप शक्य जायना. भलायकी खात्यान महिला दोतोर आनी नर्सींची बदली बंदखणींत केली जाल्यार वेवस्था करप शक्य जातलें. कैद्यांची तपासणी करपा खातीर दादले दोतोर आनी नर्सीचो आंकडो वाडोवपाची प्रक्रिया सुरू आसा.
विदेशी कैद्यांक वेळा भितर व्हिसा मेळना, अशी कागाळ आसा. व्हिसा खातीर हेर खात्यां कडेन सोपस्कार करचे पडटात. हाका उशीर जाता. हेर खात्यांनी सोपस्कार बेगीन केले जाल्यार विदेशी कैद्यांक व्हिसा बेगीन मेळटलो, अशें तांणी सांगलें.
मानवाधिकार आयोगान अहवालांत ज्यो शिफारशी केल्यात, ताचो अभ्यास सुरू आसा. हेर खात्यां कडेन पत्रवेव्हार जातलो आनी कार्यवाय जातली. इमारत दुरुस्ती भौशीक बांदकाम खात्या कडेन आसा, दोतोर आनी नर्सीची वेवस्था भलायकी खात्या कडेन आसा. सगळ्या कामां खातीर हेर खात्यांचेर निंबून रावचें पडटा, म्हूण कामांक कळाव जाता, अशें अतिरिक्त बंदखण म्हानिरिक्षकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
