भांगरभूंय | प्रतिनिधी
मानवाधिकार आयोग : 60 दिसांत अहवाल सादर करपाचे बंदखण म्हानिरिक्षकाक आदेश
भांगरभूंय । प्रतिनिधी
पणजी : कोलवाळ बंदखणीची इमारत मोडपाक पावल्या. दादल्यां सयत बायलांच्या शौचालयाक दारां नात. बंदखणीची अवस्था बाबत जाल्या आनी तिचे दुरुस्तेची गरज आसा, असो अहवाल मानवाधिकार आयोगान दिला. बंदखण म्हानिरिक्षकान 60 दिसांत कार्यवायेचो अहवाल सादर करचो, असो आदेश मानवाधिकार आयोगान दिला.
अहवालाच्यो प्रती उत्तर गोंय प्रधान न्यायाधीश, दक्षीण गोंय प्रधान न्यायाधीश आनी भौशीक बांदकाम खात्याच्या प्रधान मुखेल अभियंत्याक धाडच्यो. मानवाधिकार आयोगाचे अध्यक्ष डेस्मंड डिकोस्टा आनी वांगडी प्रमोद कामत हांणी हो अहवाल दिला. गोंय मानवाधिकार आायोगाच्या वांगड्यांनी हालींच कोलवाळ बंदखणीची पळोवणी केली. आयोगाचे अध्यक्ष डेस्मंड डिकोस्टा, वांगडी प्रमोद कामत, सचीव बिजू नायक, अवर सचीव अनिता भोसले, अधिकारी उमेश देसाय आनी कायदो सहाय्यक नितेश आंबेकार हांणी भेट दिली. ह्या वेळार उप बंदखण म्हानिरिक्षक एस. पी. गोलतेकार आनी हेर कर्मचारी हाजीर आशिल्ले. महिला कैद्यांनी बंदखणी विशींच्यो समस्या ह्या वेळार मांडल्यो.
आयोगान पळोवणी उपरांत केल्ल्यो शिफारशी अश्यो : इमारतीची अवस्था बाबत आसा. दुरूस्ती सयत इमारतीक रंग मारपाची गरज आसा. दादल्यां सयत बायलांच्या शौचालयांक दारां नात. हें मानवाधिकाराचें उल्लंघन थारता. सीवेज यंत्रणा सारकी नाशिल्ल्यान सगळो वाठार बुरसो जाता. महिला कैद्यांक तपासपा खातीर महिला वैजकी अधिकारी ना. महिला वैजकी अधिकाऱ्यां सयत एक दादलो आनी एक बायल नर्सीची नेमणूक करपाची गरज आसा. महिला कैद्यांक योग्य प्रमाणांत कपडे दिवपाची गरज आसा. सारके कपडे मेळना, अशी महिला कैद्यांची कागाळ आसा. कैद्यांक वैजकी तपासणी तशेंच न्यायालयांत व्हरपा खातीर एस्कोर्ट वेवस्था करपाची गरज आसा. विदेशी कैद्यांच्या व्हिसाचे अर्ज बेगीन फुडें धाडपाची गरज आसा. अर्ज बेगीन फुडें धाडिनात, अशी कागाळ आसा. विदेशी कैद्यां खातीर आयएसडी सुविधा दिवपाची गरज आसा. बंदखणींत थंड उदका खातीर कुलर तशेंच हून उदकाची वेवस्था करची. उदकाची वेवस्था सारकी ना. जळारांचो उपद्रव उणो करपा खातीर जनेलांक जाळी बसोवपाची वेवस्था करची. हॉस्पिटल ब्लॉक बंद आसा, तो परतून सुरू करचो. अर्ज केल्या उपरांत कैद्यांक अॅकनोलेजमेंट पावती दिवची. बंदखणींत मोबायल जॅमर्स बसोवपा सयत सीसीटीव्ही कॅमेरे चलपा इतली वेवस्था करची. मोबायल जॅमर्स नाशिल्ल्यान बंदखणींत मोबायलाचो वापर जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
